ازاي تقدم على مبادرة البنك المركزي للتمويل العقاري؟

كتير مننا بيدور على سكن، بس في أغلب الوقت مفيش سيولة كفاية ومش هتلاقي بسهولة حد يبيع شقته بالتقسيط على 20 سنة و بقسط مناسب، عشان كدة البنك المركزي قرر تخصيص 50 مليار جنيه لدعم التمويل العقاري، وهي مبادرة تستهدف متوسطي الدخل وبتدعمهم في الحصول على سكن بتمويل ممكن يوصل لـ 2.25 مليون جنيه مصري بفائدة 8% متناقصة ولمدة توصل لغاية 20 سنة.

 

ازاي اعرف اني ممكن استفيد من المبادرة دي؟

 

1. تكون مصري الجنسية.

 

2. دعم التمويل العقاري بيكون مرة واحدة بس، فـ لازم تكون ماستفدتش بأي مبادرة تمويل عقاري قبل كده.

 

3. الحد الأدنى للدخل لازم يكون 4000 جنيه للفرد، و5000 جنيه للأسرة (دخل الزوج+دخل الزوجة) في الشهر.

 

4. الحد الأقصى للدخل هو 40,000 جنيه للفرد، و50,000 جنيه للأسرة في الشهر.

 

5. الـ i-score بتاعك يكون تمام.

 

6. تكون مسدد على الأقل 20% من تمن الوحدة.

 

تقدر تقدم على تمويل وحدتك عن طريق 19 بنك موجودين حواليك زي بنك مصر،بنك القاهرة، بنك التعمير والإسكان والبنك التجاري الدولي CIB.

 

ايه مواصفات الوحدة السكنية اللى اقدر اخد عليها الدعم؟

 

1. لازم الوحدة تكون الغرض منها السكن الدائم.

 

2. ماينفعش تستغل المبادرة لتمويل السكن السياحي زي المصايف مثلاً.

 

3. مساحة الوحده مش أكبر من 150 متر.

 

4. تكون الوحدة كاملة التشطيب وجاهزة للسكن عند الاستلام.

 

شوية مصاريف كمان لازم تكون على علم بيها:

 

1. لو حبيت تبيع الوحدة بعد فترة أو تسدد كل اللي عليك سداد مُعجل فـ هتضطر ترد المبلغ اللي عليك بسعر الفايدة على القروض العقارية العادية بدون دعم + مبلغ الدعم اللي اترفع عنك كل الفترة اللي فاتت.

 

2. غرامة التأخير في السداد هي 2% على المبلغ المتبقي.

 

3. المصاريف الإدارية 2%.

 

ازاي اقدر اقدم ؟

 

لو كل الشروط اللي فوق مناسبة ليك وللوحدة السكنية اللي بتفكر فيها، تقدر تقدم على تمويل وحدتك عن طريق 19 بنك موجودين حواليك زي بنك مصر،بنك القاهرة، بنك التعمير والإسكان والبنك التجاري الدولي CIB.