ايه هو الاستثمار العقاري؟ وازاي تستثمر فلوسك في العقارات؟

تاريخ النشر: في عالم المال

ايه هو الاستثمار العقاري؟ وازاي تستثمر فلوسك في العقارات؟

عايز تستثمر في العقارات؟ خلي بالك من الحاجات دي

الاستثمار في العقارات يعتبر استثمار آمن، مباشر وبسيط لإنه من مصادر الربح اللي المخاطرة فيه بتبقى قليلة نسبياً لإن نادراً ما بيقل سعر العقارات. فسواء كنت تمتلك عقار ولكن مش عارف إزاي تستفيد منه، أو بتفكر في الاستثمار في مجال العقارات ومش عارف إزاي تبدأ فأنت في المكان الصح.

طبعا أنت عندك مميزات كتير لو عندك عقار بالفعل زي إنك ممكن تاخد قرض بضمان العقار ده بسهولة من أي بنك مدام العقار له عائد، بس ازاي بقى ندخل المجال ده بشكل صحيح ونحقق منه أكبر نسبة ربح؟ 

أولاً، الاستثمار العقاري زي ما مكسبه ممكن يكون كبير، فهو كمان محتاج صبر وتركيز.

 

لو عندك عقار أو شقة ومش بتستخدمها أو معاك مبلغ يكفي تجيب شقة وحابب تستثمره:

 

الإيجار من الطرق السهله للاستفاده من العقارات اللي بتملكها والعائد بتاعه هتشوفه بشكل سريع وهيضمنلك دخل على أساس منتظم، فبالتالي هتعوض تمن الشقه وتحقق ربح في وقت قصير وكمان بعد فترة لو زهقت ممكن تبيعه وطبعا هيكون بسعر أعلى من اللي اشتريته بيه.

 

لو مش معاك فلوس بس حابب تستثمر في المجال ده بقى.. ركز معايا:

 

ممكن تاخد قرض تمويل عقاري وده بيكون بسعر فايدة أقل وعلى مدة أكبر بتوصل لـ20 سنه، وساعتها هيكون القسط أصغر، وبعد كده هيكون عندك اختيارين :

1. إنك تأجره وتدفع القسط من الإيجار وممكن كمان الإيجار يكون أكبر لو في منطقة من اللي الطلب عليها كبير.

 

2. إنك تسكن في العقار ده وتستفيد بيه براحتك وبعد فترة، من 5 لـ7 سنين، تبيعه بسعر أعلى، وتسدد اللي فاضل من القرض، وهيكون عندك وقتها مكسب ممكن تكرر بيه الحركه دي تاني على حسب طبعاً قيمة العقار، بس خلي بالك ساعتها البنوك ممكن تطبق عليك مصاريف زيادة بسبب السداد المبكر.

 

 

الإيجار من الطرق السهله للاستفاده من العقارات اللي بتملكها والعائد بتاعه هتشوفه بشكل سريع وهيضمنلك دخل على أساس منتظم.

 

دي كمان بعض النصائح علشان تختار العقار الصح بهدف الاستثمار:

 

1. اسأل كويس على العقار قبل ما تشتريه.

 

2. خد رقم العقد المسجل في الشهر العقاري، واسأل عليه في الشهر العقاري عشان تتأكد إنه ملك الشخص اللي أنت هتشتريه منه، وإنه ما تمش بيعه لحد تاني.

 

3. اتأكد من مصلحة الضرايب إن الضريبة العقارية مدفوعة، وضريبة القيمة المضافة لو العقار ده بيتم تأجيره.

 

4. اختار العقار اللي يكون قريب للخدمات زي السوبرماركت والصيدلية.

 

5. لازم يكون قريب من المواصلات أو الشارع الرئيسي. 

 

6. يكون سهل الوصول ليه بالعربيه وجنبه علامات مميزة للمكان. 

 

7. تكون كل المرافق زي المية والنور شغالين ومش محتاجين تجديد أو تغيير كبير .

 

8. يفضل يكون في دور مش عالي علشان لو حبيت تأجره إداري.