ما هى أساسيات الاقتصاد التقليلي، وطرق تطبيقه من الحكومات؟

في السنوات الأخيرة، وبسبب مشاكل الاحتباس الحراري والكوارث الطبيعية اللي بتنتج عنه، واحساس ناس كتير بإن الإنسان بقى مهدر للموارد وبيساهم في تلوث الكوكب عن طريق الزبالة والزيادة السكانية، بقى في اتجاه ناحية تقليل الاستهلاك الغير هادف والتفكير في صحة الكوكب قبل أي حاجة تانية، ومن نوع التفكير ده، نتج عنه حاجة اسمها الاقتصاد التقليلي.

في الاقتصاد الاستهلاكي، الهدف الأول والأخير هو النمو والتنمية بدون التفكير في أي حاجة تانية، كل ما الأرقام زادت، كل ما كان أحسن لإنه بيهتم بس بالربح والقابلية للنمو.

إيه الهدف من الاقتصاد التقليلي؟

الاقتصاد التقليلي بيهدف لخفض الاستهلاك وبيعتبر حاجات زي الناتج القومي الإجمالي حاجة غير مفيدة لقياس الاقتصاد لإن بيعتبر النمو جزء من المشكلة لإنه بشجع على الاستهلاك الغير أساسي والصرف الزائد وبالتالي تلويث البيئة وإهدار الموارد.

أساسيات الاقتصاد التقليلي:

1. خفض الملوثات عن طريق اختيار أساليب حياة غير مضرة للبيئة سواء في الإنتاج أو على صعيد الحياة اليومية.

2. عدم التركيز على الناتج القومي الإجمالي كدليل على صحة الاقتصاد القومي.

3. التركيز على حقوق العمال والموظفين، فخبراء الاقتصاد التقليلي بيتهموا الرأسمالية الغير منظمة إنها السبب الرئيسي في الفقر الشديد بسبب تركيز الشركات على تخفيض المصاريف عن طريق استغلال الفقراء عشان هم ممكن يرضوا بمرتبات أقل من المعتاد. 

4. خفض الاستهلاك للأساسيات فقط، وده عن طريق عدم شراء أي حاجة الواحد مش محتاجها.

من اساسيات الاقتصاد التقليلي: خفض الاستهلاك للأساسيات فقط، وده عن طريق عدم شراء أي حاجة الواحد مش محتاجها.

إزاي ممكن الحكومات تطبق الاقتصاد التقليلي؟

• تطبيق ضرايب خاصة بالاستهلاك والتلوث زي ضريبة الكربون واللي بتعتمد على إن الشركات والمصانع الملوثة للبيئة بتدفع ضرايب للدولة زيادة عن الشركات الغير ملوثة للبيئة، وده بيشجع الشركات على إنها تحول إنتاجها من ملوث إلى غير ملوث.

• تطبيق قوانين تحمي المستهلك من الاستغلال وده بيتضمن منع المنتجين من تقليل عمر المنتجات اللي هم بيصنعوها عشان يضمنوا إنها هتبوظ بعد شوية والناس تضطر تشتري جديد، وواحدة من البلاد اللي ابتدت تطبق الموضوع ده هي فرنسا.

• تطبيق تدوير الزبالة وتشجيع الناس على فصل مخلفات الطعام عن باقي الزبالة.

• فتح مشاريع خاصة بالمنفعة العامة زي المكتبات العامة والمتاحف والحدائق المجانية عشان كل واحد يقدر يستفيد من الحياة اللي حواليه وما تبقاش أحسن الحاجات حكر على الأغنياء بس.

• تحسين المواصلات العامة لإن ده بيشجع الناس على تقليل اعتمادهم على العربيات مما هيأدي إلى خفض الملوثات.