اعرف أكتر عن قانون العرض والطلب | فايدتي

اعرف أكتر عن قانون العرض والطلب

تاريخ النشر: في عالم المال

اعرف أكتر عن قانون العرض والطلب

له تأثير كبير على حركة الأسعار، لازم تاخد بالك منه كويس

الفترة اللي فاتت دي شفنا زيادة غير طبيعية في أسعار الكحول الطبي والكمامات الطبية بعد زيادة الطلب عليهم بسبب فيروس كورونا الجديد، ولو سألت أي حد وقتها الزيادة دي سببها إيه كان لازم يرد رد واحد: عرض وطلب.

 

إيه هو العرض والطلب؟

 

العرض والطلب هما سر تحرك الأسعار اللي بتحصل في كل الأسواق بشكل يومي سواء سلع أو الأسواق المالية (سوق الأسهم والسندات). 

العرض: هو كمية السلع المعروضة بسعر معين ومُتوقع بيعها في فترة زمنية معينة.

الطلب: هو كمية السلع اللي المستهلكين بيحتاجوها في فترة زمنية معينة.

 

أساسيات قانون العرض والطلب:

 

1. الأسعار:

 

يمكن يكون الحاجة الأساسية اللي بتتحكم في قانون العرض والطلب، عشان المنتجين همهم دايماً إنهم يلاقوا السعر المثالي اللي هيحققلهم أرباح، ولكن في نفس الوقت يكون سعر تنافسي بالنسبة للمنتجات التانية اللي في السوق عشان يجذب الزبون، خصوصاً في سوق زي مصر واللي بيعتبر إنه حساس جداً لأي تغيير في الأسعار.

 

2. القيمة المتصورة للسلع والخدمات:

 

ده معناه قيمة المنتج أو الخدمة بالنسبة للزبون، فلو بالنسبة له المنتج ده لا يمكن الإستغناء عنه، ساعتها هتلاقي إنه ممكن يدفع سعر عالي شوية في سبيل الحصول عليه. وهنا التسويق بيلعب دور كبير لإن ممكن تكون قيمة المنتج الحقيقة قليلة جداً، ولكن الحملة التسويقية بتبين غير كدة، وده بيحصل كتير في ماركات اللبس، وعشان كدة ممكن تلاقي الشركة بتنزل عدد أقل عشان تعمل تعطيش للسوق وتدي إنطباع للمستهلك إن في حصرية للمنتج على ناس معينة بالتالي يلعب على فكرة الممنوع مرغوب.

 

3. كمية الإنتاج:

 

حتى لو في عرض كبير على المنتج، لو كمية الإنتاج قليلة، ساعتها هتبقى عملة نادرة، وسعرها هيزيد، والعكس صحيح، لو كمية الإنتاج بقت أعلى من الطلب، سعرها هيقل، وطبعاً نوع المنتج بيلعب دور كبير في الموضوع ده، فمثلاً لو المنتج قابل للتلف، ده هينزل السعر أكتر في حال قلة الطلب عليه.

 

العرض والطلب هما سر تحرك الأسعار اللي بتحصل في كل الأسواق بشكل يومي سواء سلع أو الأسواق المالية (سوق الأسهم والسندات). 

 

طيب إيه اللي بيأثر عليهم ؟

 

المواسم أو الفصول مثلا: فيه أنواع فواكه ليها فصول معينة فبالتالي بتتباع بسعر مختلف لما تكون في غير الموسم بتاعها. 

أو كمان لو فيه منتج تاني مرتبط بيه زي الشاي والسكر، ده غير طبعاً وجود المنافسين. 

 

إزاي العرض والطلب بيأثر على الأسعار؟

 

تعالى نرجع لموضوع الكحول و الكمامات:

لو افترضنا إن المصنع بينتج 100 عبوة بس وبيعرضهم في السوق بسعر مناسب وحصل إقبال كبير ومفاجئ زي ده هيكون المصنع محتاج يزود الإنتاج وبالتالي هتزيد تكاليف العمال والإنتاج كلها فبالتالي هيرفع الأسعار علشان يقدر يعوض تكاليف الإنتاج دي لغاية ما يوصل لمرحلة التعادل اللي فيها كل العدد اللي بينتجه المصنع بيتباع وسعر المنتج مغطي كل تكاليف الإنتاج وده شئ صعب بالنسبة للمنتجين لأن أوقات كتير بيكون السعر بعد الرفع غالي على المستهلكين فبيرجع الطلب يقل وهكذا.

 

أوقات كمان المنتجين علشان يحددوا السعر اللي يبيعوا المنتج بتاعهم عنده بيستخدموا العرض والطلب زي إنهم ينزلوا المنتج بسعر قليل وكمية قليلة ويبدأ يعلي السعر لغاية ما يوصل لنقطة اتفاق مع المشترين.