التأثير الاقتصادي لسد أثيوبيا

مشكلة سد النهضة بقالها تقريباً 9 سنين من ساعة ما ابتدوا يبنوا السد في مارس 2011، ومن ساعتها والناس في مصر بقت مقلقة من موضوع السد وتأثيره على حصة مصر من النيل، والمفروض إن السد كان يخلص في 2017، ولكن شوية مشاكل في التصميم والبناء خلت الموضوع يتأخر، بس هو إيه تأثير السد على مصر من ناحية اقتصادية؟

فين موقع سد النهضة؟

السد بيتم بنائه ناحية مخرج النيل الأزرق، وهو واحد من أهم المصادر المغذية لنهر النيل، على الحدود ما بين أثيوبيا والسودان.

ليه أثيوبيا قررت تبني السد؟

أثيوبيا عندها مشكلة أساسية في توليد الكهربا، والموضوع ده بيحد من تطورها الصناعي والاقتصادي، وعشان كدة قررت تبني سد النهضة اللي متوقع إنه يولد 6,000 ميجاوات من الكهربا.

إزاي بيمولوا بناء السد؟

السد هيتكلف 4 مليار دولار تقريباً، وأثيوبيا طرحت سندات للأثيوبين عشان تمويل السد، وأخدت قرض من بنوك صينية لتمويل باقي ثمن السد.

أثيوبيا عندها مشكلة أساسية في توليد الكهربا، والموضوع ده بيحد من تطورها الصناعي والاقتصادي، وعشان كدة قررت تبني سد النهضة اللي متوقع إنه يولد 6,000 ميجاوات من الكهربا.

هل السد هيأثر على حصة مصر من النيل؟

قلق مصر الأساسي هو نقص حصتها من النيل في فترة ملء خزان النهضة اللي بيبلغ سعته 74  كم٣، وملي السد ممكن ياخد من 5 لـ15 سنة، ومصر عايزة تمد فترة الملء على قد ما تقدر عشان تقلل من تأثيره على حصتها من النيل، ولكن أثيوبيا عايزة تملي السد في خلال 3 سنين تقريباً.

المتوقع إن نقص حصة مصر من النيل هيبلغ من 5 لـ15 مليار متر مكعب، وده تقريياً 10-25% من حصتها الحالية اللي بتبلغ 55 مليار متر مكعب ومصر عندها أصلاً عجز من المياه بيقدروه بـ20 مليار متر مكعب تقريباً.

إيه تأثير السد الاقتصادي على مصر؟

القطاع الزراعي بيستهلك نقريباً 50 مليار متر مكعب، فأي نقص في حصة مصر من النيل هتأثر أساساً على الزراعة. التقدير الأولي هو تلف 1.8 مليون فدان من الأراضي الزراعية واللي هيأثر على نسبة التوظيف في المجال الزراعي، والمشكلة إن القطاع الزراعي بيشكل جزء كبير من الناتج القومي لمصر (تقريباً 11.5%)، فبالتالي النقص ده هيترجم في حاجات تانية زي:

• زيادة البطالة بسبب نقص الوظائف في مجال الزراعة.

• تأثير سلبي على الصناعات الخاصة بالمنتجات الغذائية، واللي ممكن يأدي لقفل شركات ومصانع.

• تلف الأراضي الزراعية هيأثر طبعاً على الخضار والفاكهة المتاحة في السوق، وهيأدي لزيادة الأسعار، واللجوء للاستيراد لسد النقص.

وغير كدة، فنقص المياه، هيأثر على صناعات تانية زي صناعات مواد البناء، والحديد وهكذا، وده بالتالي وهيأدي لزيادة أسعار مواد البناء، والتأثير على المجال بالكامل، وممكن يأدي لزيادة أسعار العقارات.

ده غير طبعاً التأثير الاستهلاكي على المواطن، وممكن الحكومة تلجأ لزيادة أسعار المياه عشان تحد من الأسراف والاستهلاك الغير أساسي.