الفرق بين الشهادة الثابتة والمتغيرة

لو عايز تحوّش مبلغ ومايفقدش قيمته مع الوقت وفي نفس الوقت وانت بالك مرتاح ومتطمن؟ يبقى شهادة ادخار، 

وهي حل ظهر في آخر 5 سنين تقريباً وهي حل أفضل من الودائع أو حسابات التوفير،لأنها بتكون زي الوديعة لكن نسبة العائد بتاعتها أكبر من الودائع بكتير وأشهر نوعين في شهادات الادخار هما الشهادة ذات العائد الثابت وذات العائد المتغير،بس تفتكر العائد الثابت أحسن ولا المتغير؟ 

عشان تقرر صح لازم تعرف عنهم كل حاجة 

أولاً: الشهادات ذات العائد الثابت:

وده النوع السهل، العائد بتاعه بيفضل ثابت على طول المدة بتاعة الشهادة وكل بنك بيختلف في نسبة الفايدة اللي بيقدمها على الشهادات دي، , ومدة الشهادة ممكن تبدأ من سنة ولغاية 10 سنين في بعض البنوك .

ثانياً: الشهادات ذات العائد المتغير:

هنا العائد بيتغير كل فترة حسب السعر اللي بيحددة البنك المركزي (سعر الكوريدور) وبيكون مفيد لو انت شايف إحتمالات في زيادة سعر الكوريدور ف ده معناه ان نسبة الفايدة اللي هتجيلك هتكون في زيادة مستمرة والعكس صحيح، عشان كده بيكون فيها نسبة مخاطرة لو انت مش متابع كويس أحوال الاقتصاد في البلد، وهنا مدة الشهادة بتبدأ من 3 سنين لغاية 5 سنين.  

تقدر تاخد قرض بضمان الشهادة لغاية 90% من قيمة الشهادة سواء ذات العائد المتغير أو الثابت وبفايدة زيادة على سعر الشهادة بنسبة صغيرة جداً.

بس الشهادتين بينهم حاجات مشتركة كتير زي:

1. ماينفعش تلغي الشهاده قبل ما يعدي عليها 6 شهور على الأقل.

2. تقدر تاخد قرض بضمان الشهادة لغاية 90% من قيمة الشهادة وبفايدة زيادة على سعر الشهادة بنسبة صغيرة جداً.

3. تقدر تاخد العائد بشكل شهري،ربع سنوي، نصف سنوي أو في نهاية المدة. 

4. مفيش حد أدنى للسن فـ ممكن تعملها لأولادك.

بنفكرك إنك تقدر تقارن بين كل شهادات الإدخار الثابتة والمتغيرة وتختار الأنسب ليك من (هنا)