اليوم العالمي للتأهب للأوبئة وظهور المتحور الجديد أوميكرون!

الجمعية العامة للأمم المتحدة قررت اعتبار يوم 27 ديسمبر يوم عالمي بعنوان "التأهب للأوبئة لمنح حدوث جوائح جديدة" علشان تفكر العالم بالاهتمام بمنع انتشار أوبئة جديدة في المستقبل زي فيروس كورونا، ومن ضمن أهداف اليوم ده ضمان نقل وتبادل المعلومات العلمية عن كورونا وكيفية الوقاية منها.

زي الأيام دي من سنتين تقريبًا تم الإعلان عن اكتشاف أول حالة مصابة بفيروس كوفيد - 19 في الصين ومن بعدها والعالم كله بقى بيعاني مع الفيروس ودول كتير سجلت حالات وفاة وإصابة بأعداد ضخمة.

سلالة أوميكرون الجديدة!

فيروس كورونا بقى فيه تطور جيني جديد اسمه أوميكرون، وتم اكتشاف أول حالة في جنوب إفريقيا واتقال عنها إنها أشد عدوى بين كل متحورات الفيروس اللي ظهرت لغاية دلوقتي.

3 حالات في مصر

قبل أيام ومع نهاية 2021 وزارة الصحة كشفت عن وجود أول 3 حالات مصابين بمتحور "أوميكرون" لفيروس كورونا، واكتشفوا الحالات دي من خلال حالات الفرز والحجر الصحي للي جايين من برا.

الوزارة طالبت الناس إنهم يكملوا في اتخاذ كل الإجراءات الوقائية لفيروس كورونا زي لبس الكمامة والحفاظ على التباعد وتلقي اللقاح.

ازاي تفرق بين نزلات البرد وأعراض متحور كورونا الجديد أوميكرون؟

أعراض "أوميكرون" الجديد

·       آلام أسفل الظهر.

·       آلام العضلات.

·       التعب الشديد.

·       تعرق ليلي.

·       حكة في الحلق .

·       سعال جاف.

اللي مصاب بأوميكرون بيصدع وبيتعب بسرعة جدًا

أعراض كتير متشابهة بين دور البرد العادي وكوفيد 19 وكمان أوميكرون لكن خلي بالك:

المُصاب بالفيروس الجديد أوميكرون بيحس بالصداع والتعب بسرعة في حين إن نزلة البرد بتتطور على مدى أيام تدريجيًا.

تعمل ايه في اليوم العالمي للتأهب للأوبئة؟

·       البس الكمامة وغطي أنفك وفمك كويس جدًا واحمي نفسك وأسرتك وكل اللي حواليك.

·       اتأكد دايمًا إن ايدك نضيفة لما تيجي تلبس أو تشيل الكمامة، واغسل ايدك بصفة منتظمة.

·       حافظ على التباعد الاجتماعي مع اللي حواليك وخليك على بعد مسافة ماتقلش عن متر واحد.

·       ابعد عن الأماكن اللي تهويتها سيئة أو دايمًا زحمة.

·       افتح الشبابيك اللي حواليك علشان تحسن التهوية.

·       خد اللقاح لأن لقاحات كوفيد-19 اللي أقرتها منظمة الصحة العالمية هي لقاحات آمنة وفعالة.

خد بالك إن لغاية دلوقتي العالم لسه بيدرس المتحور الجديد من كوفيد – 19 لكن الأكيد إن الإجراءات الوقائية والاحترازية زي ما هي فاعمل حسابك وخد احتياطاتك.

العالم بعد فيروس كورونا المستجد!