ايه هو كشف الحساب الالكتروني في البنوك ومميزاته؟

سمعت عن كشف الحساب الإلكتروني؟ لو عندك حساب في البنك فأكيد جالك كشف حساب ورقي فيه كل تفاصيل رصيدك المالي و معاملاتك في البنك عالبيت أو الشغل, و طبعا ده معناه اختراق لخصوصيتك المالية.. عشان كده هيكون ضروري جدا إنك تعرف أكثر عن كشف الحساب البنكي الإلكتروني. إيه هو، مزاياه، ومين بالضبط البنوك اللي بتقدمه؟ … كل ده هتعرفه معانا هنا في بلوج فايدتي .. 

ايه هو كشف الحساب الالكتروني
 

كشف الحساب الالكتروني هو عبارة عن نسخة إلكترونية من كشف الحساب الورقي. و دوره إنه يقدم ملخص وافي عن حسابات و رصيد الشخص و معاملاته البنكية وكل التفاصيل الخاصة بيه.. و كمان شوية معلومات خاصة تخص صاحب الحساب المصرفي. وكانت البنوك عادة بتبعت منه نسخة ورقية على عنوان صاحب الحساب بشكل دوري عشان يتابع حسابه في البنك. 
 

ازاي تفتح حساب في البنك؟ اعرف من هنا: إزاي تفتح حساب في البنك؟

ليه البنوك عملت كشف الحساب البنكي الإلكتروني؟
 

بعد سنوات كتيرة من استخدام كشف الحساب الورقي, ظهرت فكرة كشف الحساب البنكي في عدد من البنوك لعدد من الأسباب هي :
 

• أولا: توجه البنك المركزي في التحول لمجتمع خالي من التعاملات النقدية الورقية ، يعني مجتمع لا نقدي. 
• ثانيا: البنوك بتشتغل على فكرة تحسين مستوى الخدمة اللي بتقدمها للعملاء ، و بتشتغل على راحتهم بأفضل شكل. 
• ثالثا: التقليل من استخدام الورق وده طبعا بسبب ارتفاع تكلفة طباعة كشف الحساب الورقي.
• رابعا: دعم فكرة الاقتصاد الأخضر كهدف من أهداف التنمية المستدامة و ده طبعا من خلال المساهمة في الحفاظ على البيئة. 
• خامسا: الحفاظ على خصوصية العملاء, وده لأن في عملاء كتير مبيفضلوش فكرة كشف الحساب الورقي اللي بتبعته البنوك على البيوت و بيميلوا أكثر أن رصيدهم المالي في البنوك يكون أمر سري. 
   

إيه هي البنوك اللي بتقدم خدمة الكشف الإلكتروني؟ 
 

في مجموعة من البنوك قامت بتطبيق فكرة كشف الحساب الإلكتروني، ولو أنت عميل في أي بنك من البنوك دي هيبقى قدامك فرصة إنك تحصل على كشف حساب إلكتروني لرصيدك في البنك .. و البنوك دي هي: 
 

1- البنك الأهلي المصري اعرف اكتر عنه من هنا 

2-  البنك التجاري الدولي CIB. اعرف اكتر عنه من هنا 

3- بنك QNB الأهلي. اعرف اكتر عنه من هنا  

4- بنك مصر اعرف اكتر عنه من هنا

5- بنك كريدي أجريكول اعرف اكتر عنه من هنا.

6- بنك HSBC اعرف اكتر عنه من هنا 

اعرف أكتر عن فتح الحسابات البنكية من هنا: حساب جاري بحد أدنى 500 جنيه: اعرف اقل 10 بنوك في الحد الأدنى

إيه هي مزايا كشف الحساب البنكي الإلكتروني 
 

لو كنت مشترك في واحد من البنوك اللي بتقدم للعميل كشف حساب الالكتروني، خلينا نقولك شوية مزايا هتستمتع بيها من خلاله ممكن نلخصهالك في كلمتين الأمان و المرونة .. و دلوقتي هنعرفك مزايا الحساب الإلكتروني في السطور الجاية:

1- تقدر تطّلع على معاملاتك المالية في أي وقت من خلال خدمة كشف الحساب الإلكتروني، و مش هتحتاج تستنى ميعاد كشف الحساب الورقي أو إنك تحتفظ بالورق لو عايز ترجع لأي بيانات. 

2- مصاريف كشف الحساب الإلكتروني هتقل طبعا عن كشف الحساب الورقي. 

3- كشف الحساب هيتبعت ليك على البريد الإلكتروني في صورة مشفرة مش هتقدر تفتحه غير بعد ما تدّخل رقم سري. 

4- هتقدر تطلب الخدمة بكل سهولة و كمان هيكون متوفر بدائل إلكترونية عشان تشترك في الخدمة 

5- هتأخد تخفيض على مصاريف كشف الحساب في حالة لو اشتركت في خدمة الكشف الإلكتروني للحسابات. 

6- و بدل ما تحتفظ بكشف الحساب الورقي هيكون عندك البيانات المالية الإلكترونية متخزنة لفترة زمنية طويلة ويقدر صاحب الحساب يرجعلها في أي وقت. 

7- هيقل تعرضك لسرقة البيانات أو المعلومات المالية. 

8- هتقدر تعرف من خلال كشف الحساب الالكتروني كل البيانات المالية المتعلقة بالقروض و المدخرات و الائتمان و المعلومات الضريبية و غيرها من الوثائق المهمة.  

و بكده تكون عرفت كل المعلومات عن كشف الحساب الالكتروني في البنوك، و ممكن تعرف كمان عن خدمة الكاش باك cash back من هنا .