ايه هى النقابات و ايه أنواعها ومميزات الاشتراك فيها؟
تاريخ النشر: 02 أكتوبر 2020 عالم المال
ليه لازم تعمل كارنيه نقابة؟
النقابة هي جمعية عمالية أو مهنية بتشتغل على تحسين وضع العمال أو المهنين في شغلهم وهدف النقابة الأساسي هو إن العمال أو المهنين يقدروا يستفيدوا على أد ما يقدروا من شغلهم، وتنظيم طريقة الشغل.
إزاي بتنضم لنقابة؟
الإنضمام لنقابة بيبقى غالباً على حسب أنت متخرج من أنهي كلية، ولكن في بعض الأحيان بيبقى على حسب شغلتك زي مثلاً لو أنت صحفي أو إعلامي، وساعتها بتحتاج تثبت إنك بتشتغل في المهنة دي، وعلى أساس ده النقابة بترفض أو بتوافق على طلبك للإنضمام للنقابة، وفي بعض الأحيان بيبقى التقديم على النقابة له سقف من حيث سن المتقدم، عشان كدة يفضل إنك تقدم من بدري.
عادة الأوراق اللي بتحتاجها بتختلف من نقابة للتانية بس في الأساس بتحتاج:
- صورة وأصل المؤهل.
- 2 صورة شخصية.
- خطاب من جهة العمل.
- شهادة الميلاد.
- فيش وتشبيه.
- خطاب من التأمينات.
لازم تجدد اشتراكك كل سنة، وإلا بتسقط المزايا.
إيه مزايا النقابات الاقتصادية؟
غير طبعاً فكرة إنك بتبقى ضمن مجموعة من الزملاء اللي بشاركوك نفس المشاكل اللي بتواجهك، فالنقابات بيبقى لها مزايا اقتصادية وبتقدر عن طريقها توفر.
- خصم على التحاليل و الكشوفات الطبية في المستشفيات والمعامل الطبية الخاصة.
- خصم في عدد من المحلات على حسب اتفاق كل نقابة.
- إمكانية الاستفادة من النوادي الخاصة بالنقابات.
- إمكانية الاشتراك في الفاعليات والرحلات الخاصة بالنقابة.
هل الاشتراك بيبقى مدى الحياة؟
لازم تجدد اشتراكك كل سنة، وإلا بتسقط المزايا.
