رحيل رجل الأعمال أنسي ساويرس، مؤسس شركة أوراسكوم للاستثمار

توفى واحد من أشهر رجال الأعمال المصريين، أنسي ساويرس، والد 3 من أغنى رجال الأعمال في مصر

بعد رحلة طويلة استمرت لمدة 91 سنة بدأ فيها من الصفر.

وتمت جنازة أنسي فى مدينة الجونة اللي أنشأتها شركة أوراسكوم وسميح ساويرس فى محافظة البحرالأحمر.

مين هو أنسي ساويرس؟

أنسي من مواليد 1930 في محافظة سوهاج، وكان والده واخواته بيشتغلوا في المحاماة، وحصل على بكالوريوس الهندسة الزراعية من جامعة القاهرة سنة 1950، بناء على طلب من والده.

قصة كفاحه ونقطة التحول

لمدة سنتين حاول أنسي يتأقلم مع الحياة في الريف بس ماقدرش يستمر، وبعد ما ساب الزراعة بدأ حياته في سوق المال والأعمال عن طريق شركة مقاولات سماها "انسى ولمعي" واللي كبرت وبقى أصحابها من أكبرالمقاولين في مصر، لكن الرئيس جمال عبد الناصر قرر تأميم الشركة سنة 1961 وسماها "شركة النصر للأعمال المدنية"، وهنا حس أنسي بخيبة أمل فقرر يهاجر ليبيا لمدة 12 سنة، بس فكر ان أكيد دي مش نهاية مشواره في مصر، وقرر يرجع في منتصف السبعينيات وأسس شركة "أوراسكوم للتجارة والمقاولات" اللي معروفة دلوقتي باسم شركة "أوراسكوم للصناعات الإنشائية"، وتوسع نشاط شركته في الثمانينيات والتسعينيات عشان يشمل  السياحة والفنادق وخدمات الكمبيوتر وخدمات الموبايل وتبقى المجموعة من أضخم الشركات المصرية من وقتها ولغاية دلوقتي. 

أعماله:

توسعت شركة أوراسكوم واتطورت لـ 3 شركات تشغيل منفصلة هما: أوراسكوم تليكوم، برئاسة ابنه الأكبر، وأوراسكوم للتنمية والفنادق بقيادة ابنه الأوسط، وأوراسكوم للإنشاء والصناعة التي كان يشرف عليها ابنه الصغير. ده غير مؤسسة التنمية الاجتماعية وبرنامج المنح الدراسية اللي وصّل الطلبة المصريين للدراسة في الخارج.

ثروة واحدة من أغنى عائلات مصر!

أنسي هو والد نجيب وسميح وناصف ساويرس اللي يعتبروا من أغنى 3 رجال أعمال في مصر ده غير انجازاتهم الكتيرة في التعمير والتشييد على مستوى مصر كلها.

 وحسب مجلة فوربس الأمريكية في قائمتها لأغنياء العالم لأربع أسماء دخلت القائمة بترتيب مختلف، وهو كالاتي:

فى المركز الأول فى قائمة أغنياء العرب، ناصف ساويرس بثروة 8.3 مليار دولار 

فى المركز الرابع في قائمة أغنياء العرب، نجيب ساويرس  بثروة 3.2 مليار دولار 

فى المركز الـ 21 فى قائمة أغنياء إفريقيا، أنسي ساويرس  بثروة 1.9 مليار دولار 

وفى المركز الـ 26 فى قائمة أغنياء إفريقيا، سميح ساويرس بثروة 1.1 مليار دولار