صرف المعاشات بقي بالمحافظ الإلكترونية الـ E-Wallet

بداية شهر رمضان كانت مبشرة جدا بالنسبة لأصحاب المعاشات بسبب البيان الأخير اللي أعلنته هيئة التأمينات الاجتماعية بالاتفاق مع البنك المركزي والجهاز القومي لتنظيم الاتصالات، ووضحت فيه طريقة جديدة لـ صرف المعاشات من خلال المحافظ الإلكترونية/ الـ E-Wallet.

تفاصيل صرف المعاشات بالمحفظة الإلكترونية:

• صاحب المعاش أو المستفيد بيطلب خطاب برقم موبايله من شركة المحمول التابع ليها.
• بعد كده بياخد الخطاب لـ مكتب التأمينات وبيطلب تحويل كل الاستحقاقات التأمينية على رقم الموبايل من خلال المحفظة الإلكترونية/ E-Wallet
• بتوفر خدمة صرف المعاشات من خلال الـ E-wallet  سحب الفلوس من منافذ شبكات التحصيل والصرف الإلكتروني زي فوري وأمان، وماكينات الصراف الاّلي ومكاتب البريد اللي موجودة في كل مكان في مصر
• تقدر من المحفظة الإلكترونية تشتري أونلاين أو من المحلات التجارية وكمان تدفع كل الفواتير زي الكهرباء والغاز
• أول 6 شهور من الخدمة هتكون ببلاش

وكانت  نيفين القباج وزيرة التضامن الاجتماعى أكدت أن وزارة التضامن بتنفذ خطة متكاملة لتطوير منظومة الصرف لبرامج الحماية الاجتماعية، عشان تواكب استراتيجية الحكومة والبنك المركزى الخاصة بتطوير الاقتصاد القومى والتوسع فى استخدام وسائل وقنوات الدفع الإلكتروني، عشان تتحول  للاقتصاد رقمى اللي بيقلل من الاعتماد على الكاش

يعني إيه المحفظة الإلكترونية/ E-Wallet؟

هي ابلكيشن على الموبايل تبع البنوك، ممكن يتربط بحساب بنكي، وممكن لأ، بيستخدم فى عمليات الدفع وتحويل الفلوس من عميل لعميل، وبيعتبر نوع من الحسابات المدفوعة مقدما، لأنك بتشحنها بالفلوس اللي بتحتاجها في دفع فواتيرك. الخدمة بدأت فى مصر سنة 2013 ومشترك فيها لغاية دلوقتي حوالي 17 بنك.

أدخل على بلوج فايدتي واعرف أكتر يعني ايه E-Wallet/محفظة إلكترونية؟