كابي كسب مليون دولار من فيديوهاته اللي من غير حوار!

تاريخ النشر: في عالم المال

كابي كسب مليون دولار من فيديوهاته اللي من غير حوار!

شفت كام فيديو لكابي؟

قدر الشاب الإيطالي كابي/ Khaby يكسب مليون دولار في سنة واحدة من خلال فيديوهاته الصامتة علي تطبيق التيك توك/ TikTok فى فترة الحجر الصحي الخاص بفيروس كورونا!

 

هو مين كابي؟

 

كابي هو شاب فقير من إيطاليا، عنده 21 سنة، عايش مع امه في بيت فقير. في بداية سنة 2020، اترفد كابي من المصنع اللي كان بيشتغل فيه بسبب جائحة فيروس كورونا اللي اثرت بالسلب علي الكتير من الأعمال، وزي باقي الإيطاليين، اضطر كابي يقعد في البيت بسبب الحجر الصحي لمدة أطول من سنة، فكر وقتها انه يكسر ملل الحجر بتصوير فيديوهات لتطبيق التيك توك.

بعد فترة قرر يغير اسلوب الفيديوهات من خلال تصوير فيديوهات للتريقة علي الفيديوهات المنتشرة على وسائل التواصل الاجتماعي اللي بيقوم فيها الناس بأمور غريبة، الغريب في الموضوع أن كابي مقلش ولا كلمة في كل فيديوهاته واكتفي بتعبيرات وشه المضحكة، اللي وصلت متبعينه لـ 10 مليون في أقل من شهرين، وانتشرت فيديوهاته اللي مش محتاجه ترجمة في العالم كله.


 

متابعين كابي وصلوا دلوقتي لأكتر من 71 مليون متابع على التيك توك

 

متابعين كابي وصلوا دلوقتي لأكتر من 71 مليون متابع على التيك توك، وقدر يكسب مليون دولار أمريكي بسببها في أقل من سنة، الغريب انه لسه محافظ على أسلوب حياته، فهو لسه عايش مع امه في بيتها الفقير و لسه علي علاقة بصديقته اللي معاها من قبل ما يشتهر وبيقول أنه عايز يحوش فلوس اكتر عشان يقدر يشتري لأمه بيت كبير.
 

قوة السوشيال ميديا!
 

مع انتشار السوشيال ميديا/ وسائل التواصل الاجتماعي ما بين كل الأعمار في العالم كله، في اخر 10 سنين بدأت تظهر قوتها اللي معروفة بـ Power of Social Media، وهي القوة اللي بتقدر تنشر الأخبار والأمور المحتاجة تنتشر فعلا، زي ازمة الحقنة الغالية اللي كان محتاجها الطفل المصري رشيد في الايام اللي فاتت، ولكن الجديد أن القوة دي بدأت تظهر لنا أصحاب المواهب الجيدة فعلا زي كابي، المعروفين بصناع المحتوي وبتكسبهم فلوس كتير! ومين عارف ممكن الموهبة اللي جاية تكون جنسيتها ايه؟ وتقدم لنا إيه؟ وتكسب كام من السوشيال ميديا!