كل اللي محتاج تعرفه عن العملات البلاستيكية الجديدة

تاريخ النشر: في عالم المال

كل اللي محتاج تعرفه عن العملات البلاستيكية الجديدة

إيه رأيك في فكرة العملات البلاستيك؟

مؤخرا ظهرت أخبار عن أول صور لفئتين الـ 10 والـ 20 جنيه المصري المصنوعين من البلاستيك المقرر إصدارها فى نوفمبر اللي جاي من المطبعة الجديدة للبنك المركزي المصري في العاصمة الإدارية الجديدة، وهيتم طباعة فئات النقد المصرية الـ 10 والـ20 جنيه من مادة البوليمر المعروفة إعلاميا بـ(النقود البلاستيكية)، بس العملات دي  مش هتلغي نفس الفئة من العملات الورقية، والفئتان هيكونوا متوفرين في السوق ومتاح تداولهم.


 

ليه بلاستيك؟

 

قال وكيل محافظ البنك المركزي لدار طباعة النقد في تصريحات سابقة إن العملة مصنوعة من مادة (البوليمر) وهي مش بلاستيكية ولكن قريبة من البلاستيك زي العملات المتداولة في بعض الدول الأوروبية.

والعملات هتكون مصممة من 13 طبقة، وهتتميز العملات البلاستيكية بمواصفات أفضل بالمقارنة بالعملة الورقية زي طول فترة عمرها الافتراضي، وانها مش سريعة التلف أو التشوه، وصعب تزويرها، ده غير انها مصنوعة من مواد صديقة للبيئة ومقاومة للرطوبة والمياه والميكروبات.


 

آخر تطورات العملات البلاستيك

 

بعد نزول صور لنماذج تصميمات متوقع استخدامها في طباعة العملات الجديدة، بعض الناس كان ليهم تعليقات على التصميمات، لكن البنك المركزي صرح بأن: النماذج دي هي واحدة من نماذج متعددة جاري تصميمها للعملات البلاستيكية وبكده هي ليست نهائية وقابلة للتطوير.

 

العملة مصنوعة من مادة (البوليمر) وهي مش بلاستيكية ولكن قريبة من البلاستيك زي العملات المتداولة في بعض الدول الأوروبية.


 

رحلة تطور الفلوس في مصر

 

أول عملة مصرية كانت سنة 1834 على شكل عملات من الذهب والفضة والعملة الواحدة كان اسمها قرش، وبعد كده سنة 1836 تم إصدار الجنيه المصري لأول مرة، وقيمته استندت على قيمة العملات اللي قبله واعتمد على نظام المعدنين (الذهب والفضة)، وبقى القرش 1/100 من الجنيه. 

سنة 1885 تم التخلي عن نظام المعدنين، وبقي الجنيه بيعتمد على الذهب في تحديد قيمته، وتم تقسيم القرش لـ 10 أجزاء كان الأول اسمها "عُشر قرش"، وبعدين بقى اسمها "مليم" سنة 1916.


 

إصدار الجنيه الورقي

 

تم إصدار أول جنيه ورقي سنة 1899 عن طريق البنك الأهلي المصري، وبعد كدة تم إسناد الدور ده للبنك المركزي المصري، وتم إنشاء قسم لطباعة العملات النقدية سنة 1967، وكان بيطبع بعض العملات للبلاد المجاورة كمان.