ليه سعر الفايدة بيختلف من بنك للتاني؟

تاريخ النشر: في عالم المال

ليه سعر الفايدة بيختلف من بنك للتاني؟

عارف ليه كل بنك منتجاته البنكية سعرها مختلف عن باقي البنوك؟

البنك المركزي بيعمل اجتماع كل 45 يوم عشان يحدد هبثبت سعر الفايدة ولا هيغيره الفترة الجاية، والقرار ده بيكون مبني على حاجات كتير زي العرض والطلب مثلاً، وعلى أساسه بتتغير أسعار الفايدة في البنوك في الإيداع والإقراض. بس ليه البنوك مش بتمشي على نفس سعر الفايدة اللي بيحدده البنك المركزي؟

 

مبدئياً النسب اللي بيحددها البنك المركزي لأسعار الفايدة للإيداع والإقراض بيقصد بيها ان الاسعار دي للبنوك لما تعمل إيداع أو تقترض فلوس من البنك المركزي، وده لأن البنك المركزي مبيتعاملش مع أفراد.

 

البنك بيكسب منين؟

 

تعالى نفترض أن البنك جاله عميلين بس طول اليوم، في أول اليوم جه العميل الأول يعمل وديعة بمبلغ 100,000 جنيه، وبعدين جه عميل تاني عايز ياخد قرض بمبلغ 80,000 جنيه فـ البنك هياخدهم من الـ 100,000 بتوع العميل اللي عمل الوديعة، فـ دلوقتي البنك عشان يعمل مكسب لنفسه لازم يدي القرض للعميل التاني بسعر فايدة أعلى من سعر الفايدة اللي هيدفعه لصاحب الوديعة، طيب دلوقتي البنك متبقي عنده 20,000 جنيه هيعمل بيهم ايه؟

  • الحل الأول أنه يدخلهم في استثمارات تجيبله عائد.
  • الحل التاني انه يحطهم كوديعة في البنك المركزي اللي هيدخل الفلوس دي في استثمارات ومشاريع للدولة ويدي البنك عائد عليها.

 

بس خلي بالك عشان البنك يكسب في الحالتين لازم العائد على  الـ20,000 جنيه دول يكون أكبر من فايدة الوديعة اللي هيديها للعميل الأول، عشان كده لازم سعر الفايدة على الإيداع في البنوك كلها يكون أقل من السعر في البنك المركزي.

 

طيب لو العميل التاني كان عايز مبلغ 150,000 جنيه؟

 

كده البنك محتاج 50,000 جنيه فـ هياخدهم قرض من البنك المركزي وهيدفع عليهم فايدة معينة، فعشان البنك يكسب لازم يدي القرض للعميل بسعر فايدة أعلى من اللي البنك نفسه هيدفعه للبنك المركزي، وعشان كده سعر الفايدة بيختلف عن البنك المركزي.

 

النسب اللي بيحددها البنك المركزي لأسعار الفايدة للإيداع والإقراض بيقصد بيها ان الاسعار دي للبنوك لما تعمل إيداع أو تقترض فلوس من البنك المركزي، وده لأن البنك المركزي مبيتعاملش مع أفراد.

 

ليه سعر الفايدة بيختلف من بنك للتاني؟

 

  • عدد العملاء والمبالغ اللي العملاء بيتعاملوا بيها بتختلف من بنك للتاني، فممكن بنك ميحتاجش يستلف من البنك المركزي مبلغ كبير لأن معاملاته اليومية كفاية بالنسباله يبقى ليه هيعلي سعر الفايدة على القروض بنسبة كبيرة؟    
  • في بنوك مش بتحتاج تستلف من البنك المركزي خالص فمش هتحتاج تغير الفايدة بتاعتها لما البنك المركزي يغيرها.
  • الخدمات اللي بتقدمها البنوك زي خدمة العملاء السريعة، وخدمة موظف البنك اللي بيجيلك لغاية البيت بالأوراق كلها، وميزة أن الأوراق المطلوبة تكون قليلة، كل ده بيتحسب ضمن نسبة الفايدة اللي البنك بيحددها.



 

أهم حاجة قبل ماتقرر تقدم على أي منتج بنكي، زي القروض والشهادات والكريدت كارد،  تقارن أسعار الفايدة على المنتج ده فى كل البنوك عشان تقدر تحدد البنك اللي شروطه وأسعاره مناسبة ليك، وفايدتي هتساعدك فى الموضوع ده لأننا جمعنا كل البنوك فى مكان واحد، كل اللي عليك انك تختار اللي يناسبك وأحنا هنعرض لك شروطه وكل الأوراق المطلوبة وخطوات التقديم خطوة بخطوة.

 

بالنسبة للإيداع: 

 

البنوك في الأغلب بتحدد سعر الفايدة بتاعتها على الإيداع يكون أقل أو يساوي سعر الفايدة اللي حدده البنك المركزي عشان البنك يعمل لنفسه مكسب من ايداع الفلوس دي عند البنك المركزي كوديعه.

يعني مثلاً: لو البنك المركزي حدد سعر الفايدة على الإيداع يساوي 8.25% يبقى كده أغلب البنوك هتحدد سعر فايدة أقل من النسبة دي، عشان لما يعمل ايداع للفلوس دي عند البنك المركزي وياخد من البنك المركزي الفايدة ويديهالك يبقى ليه مكسب من الفرق ده.