نبذة عن البنك المركزي المصري

البنك المركزي مسئول عن كل حاجة مالية في البلد، وهو اللي بيحدد طريقة شغل البنوك، وهو اللي بيحدد معدل الفايدة اللي بتشتغل بيها البنوك.

بداية البنك المركزي

طلع قرار بتأسيس البنك المركزي المصري سنة 1960 وابتدى تنفيذ مهامه في 1961، بس قبل كدة كانت كل المهام بتاعته بيقوم بيها البنك الأهلي، وده يتضمن طبع الجنيه المصري، وبعد كدة الحاجات دي اتنقلت للبنك المركزي، والبنك الأهلي بقى بنك حكومي عادي.

محافظ البنك المركزي هو المسئول عن إصدار القرارات، وبيتم تعينة عن طريق رئيس الجمهورية لمدة 4 سنين

صفات وشغل البنك المركزي

البنك المركزي يعتبر وحدة مستقلة، يعني ما فيش كيان أو حد له سلطة عليه، بس هو عادة بيتفق على الخطة النقدية مع الحكومة.

البنك المركزي هو اللي بيحدد امتى بيتم طبع الفلوس وبكمية أد إيه.

هو اللي بيدير الاحتياطي النقدي والذهب.

هو اللي بيدير البنوك، وبيراقب شغلهم، وبيعاقبهم لو حصلت حاجة غلط.

هو اللي بيدير حركة العملات الأجنبية قي السوق، وازاي بتخرج من السوق المصري، وعشان كدة في 2016 في عز أزمة الدولار، كان صعب جداً فتح اعتمادات أو تغيير عملة أو تحويل دولارات برة البلد لإن البنك المركزي كان عايز يحافظ على الاحتياطي من الدولار لدرجة إن الشركات الدولية كان عندهم صعوبة في إنهم يحولوا أرباحهم لمقراتهم الرئيسية برة. 

مراقبة ومواجهة التضخم وارتفاع الأسعار بالسوق المصري.

مين اللي بيصدر القرارات في البنك المركزي؟

محافظ البنك المركزي هو المسئول عن إصدار القرارات، وبيتم تعينة عن طريق رئيس الجمهورية لمدة 4 سنين، وعادة بيبقى حد له خبرة في إدارة البنوك وعشان كدة أغلب الوقت بيبقى مدير بنك سابق. حالياً، محافظ البنك المركزي هو طارق عامر، وهو كان مدير البنك الأهلي. ومن ساعة ما تم تأسيس البنك المركزي، عدى عليه 13 محافظ لغاية دلوقت.