يعني إيه الناتج المحلي الإجمالي؟
تاريخ النشر: 08 سبتمبر 2020 عالم المال
ازاي تعرف الحالة الاقتصادية العامة للدولة؟
الناتج المحلي الإجمالي هو قياس لقيمة السوق لدولة معينة بكل السلع والخدمات الموجودة في السوق ومعدل الاستهلاك في خلال مدة زمنية محددة عادة بتبقى سنة.
إيه فايدة معرفة الناتج المحلي الإجمالي؟
ده بيساعد في معرفة الحالة الاقتصادية العامة للدولة ومعدل نمو السوق، وده بيدي مؤشر للحالة الاقتصادية المتوقعة في المستقبل القريب.
في نفس الوقت الناتج المحلى الإجمالي بيساعد في حساب ثمن المعيشة في الدولة، كل ما الناتج المحلي الإجمالي بقى عالي، كل ما بقت البلد غالية.
لو قيمة السلع والخدمات عليت بسبب التضخم، فده هيأدي لارتفاع الناتج المحلي الإجمالي حتى لو معدل الإنتاج ماتغيرش
إيه اللي بيأثر على الناتج المحلي الإجمالي؟
في عوامل كتير بتأثر على الناتج المحلي الإجمالي ، وإيه اللي بيأثر عليه مباشرة بيعتمد على طريقه حسابه لإن في 3 طرق لحساب الناتج المحلي الإجمالي عن طريق حساب المصروفات المحلية أو معدل الإنتاج أو دخل المواطنين.
وعشان كدة العوامل اللي ممكن تأثر على الناتج المحلي الإجمالي هي:
- العرض والطلب على السلع والخدمات.
- معدل الإنتاج في البلد.
- دخل المواطن.
- المصروفات الحكومية.
- معدل الاستهلاك العام.
- معدل الاستثمارات في البلد.
- معدل الاستيراد.
- التضخم.
إزاي التضخم بيأثر على الناتج المحلي الإجمالي؟
الناتج المحلي الإجمالي بيعتمد في أساسه على قيمة السلع والخدمات في السوق، وعشان كدة هو مرتبط بالتضخم، فلو قيمة السلع والخدمات عليت بسبب التضخم، فده هيأدي لارتفاع الناتج المحلي الإجمالي حتى لو معدل الإنتاج ماتغيرش، وعشان كدة بقى فيه نوعين من الناتج المحلي الإجمالي: الإسمي والفعلي. الإسمي هو اللي بيبقى عامل حساب التضخم، والفعلي ما بيبقاش متضمن تأثير التضخم على الأسعار وده بيبين حالة الاقتصاد العامة أحسن من الإسمي.
