يعني إيه فقاعة عقارية؟

الفقاعة العقارية عادة بتحصل لما أسعار العقارات بتزيد زيادة كبيرة في فترة قصيرة بسبب زيادة الطلب عليها، وقلة عدد العقارات المعروضة، وبعد فترة الموضوع بيتعكس، والطلب بيقل على العقارات، مع زيادة العقارات المعروضة، وبما إن مافيش حد بيشتري، فالأسعار بتبتدي تنزل، بس في حالة الفقاعة، الأسعار بتنزل بطريقة فجائية وبسرعة، وبنسبة كبيرة.

ليه بتحصل فقاعة عقارية؟

السبب الرئيسي للفقاعة العقارية هو  زيادة الطلب واللي بيأدي  لزيادة الأسعار عن تقديرها المعتاد، وده بيخلي الناس اللي عايزة تستثمر فلوسها إنها تبتدي تشتري بسرعة في المناطق اللي أسعارها بتزيد على أساس إن الأسعار هترتفع أكتر وهيقدروا يبيعوا العقارات دي، ويستفيدوا من الزيادة. وفي نفس الوقت السوق بيدخل في حلقة مفرغة من الشراء وزيادة الأسعار لغاية ما الناس العادية اللي عايزة تشتري بيوت تعيش فيها ما بتقدرش تدفع الفلوس المطلوبة في العقارات دي، فالطلب بيقل، والأسعار تبتدي تنزل بسرعة، وده بيأدي لإن قيمة العقارات نفسها تنزل جامد. 

وفي نفس الوقت، التمويل الغير منظم برضو بيبقى من مسببات الفقاعة العقارية زي اللي حصل في أمريكا في 2008، لإن البنوك بتتسرع في الموافقة على تمويل بيوت لناس ممكن ما يبقاش تاريخها الائتماني كويس، وبرضو عمليات البيع دي بتساهم في زيادة الأسعار، وبعد كدة لما السوق ينهار، الناس دي ما بتقدرش تسدد ديونها، وده بيساعد على زيادة إنهيار الأسعار.

ليه الطلب على العقارات بيزيد فجأة؟

1. إنتعاش حركة السوق، واللي بيخلي الناس عندها فلوس زيادة عايزين يستثمروها.

2. زيادة عدد السكان في منطقة ما، فبيبقى في زيادة طلب على العقارات الموجودة في المكان ده.

3. انخفاض الفايدة على القروض واللي بيشجع الناس على تقديم على قروض عقارية.

4. المضاربة على العقارات بنية الاستفادة السريعة منها.

5. الجهل المالي عند الناس واللي بيخليهم يقدموا على قروض هم مش هيقدروا يسددوها بعد كدة.

طيب وإيه اللي بيخلي الفقاعة العقارية تفرقع؟ إنعكاس نفس العوامل اللي سببت في الفقاعة بسبب قلة الطلب على العقارات.

هل ممكن توقع فرقعة الفقاعة العقارية؟ من الصعب جداً توقع إمتى الفقاعة هتفرقع لإن السوق في الحالة دي ما بيبقاش منطقي.