تفضل إيه؟ Freelancing ولا Full Time

سؤال منتشر كتير الفترة الأخيرة: إيه الفرق بين الوظيفة بدوام كامل/ full time  والعمل الحر freelancing؟ مين فيهم افضل من التاني؟ الآراء اختلفت عشان كده قررنا نحط قدامكم مميزات وعيوب الطريقتين عشان تختاروا المناسب ليكم.

تعريف الطريقتين:

الوظيفة بدوام كامل هو لما يتم تعيين شخص في منظمة أو شركة، وفي الحالة دي بيشتغل بعدد ساعات محددة من الشركة دي.

أما العمل الحر فهو العمل لحسابك الخاص من غير الارتباط بشركة معينة.

كتير بيفضلوا طبيعة العمل الحر، لأنهم رئساء نفسهم، وبيكونوا أحرار في اتخاذ خياراتهم وقراراتهم الخاصة. لكم من المهم تقييم إيجابيات وسلبيات الخيارين قبل تحديد الأنسب ليك.

مميزات العمل الحر:

1- العمل من أي مكان وفي كل مكان، يعني تشتغل بالبيجامة في البيت، أو بالمايوه علي البحر مش مهم المهم أن الشغل يخلص.

2- خد أجازتك لما تحب، مش محتاج تستأذن حد علي الأجازة، بس هتظبط مواعيد تسليم الشغل لما تحب تستريح شوية.

3- مفيش ساعات عمل ثابتة، مش لازم تلتزم بـ 8 ساعات عمل زي الشركات بس تقدر تقلل وتزود على مزاجك، وممكن تشتغل الصبح او بليل براحتك.

4- مفيش مرتب ثابت، تقدر تشتغل في أكتر من مشروع في الشهر وتكسب أكتر من اللي بيأخد مرتب ثابت كل شهر.

عيوب العمل الحر:

1- مفيش دخل ثابت، بالرغم من أنه ممكن يكسب أكتر من المرتب الشهري لكن ممكن يكسب كتير في شهر ويعقد بالشهور من غير مشاريع جديدة ولا دخل جديد.

2- مفيش مزايا، ميزة التأمين الاجتماعي والتأمين الصحي والإجازات المدفوعة الأجر كل ده بتستغني عنه بالعمل الحر.

3- العمل وحيد، اللي بيشتغل في مكتب بيشتغل مع فريق عمل كل يوم وبيفكر معاهم وبيتناقشوا، لكن العمل الحر بـ تضطر تكتفي بأفكارك وبتعمل كل حاجة بايدك.

كتير بيفضلوا طبيعة العمل الحر، لأنهم رئساء نفسهم، وبيكونوا أحرار في اتخاذ خياراتهم وقراراتهم الخاصة

مميزات العمل بدوام كامل:

1- المرتب الثابت والمزايا، العمل بدوام كامل في شركة بيكون معاه مرتب شهري، يعني دخل مستقر، حتي لو أقل من مكسب العمل الحر لكن علي الأقل مضمون.ده غير مزايا التأمين الصحي والإجازة السنوية المدفوعة. وبتتراوح متوسط المرتبات للمبتدئين ما بين 3,000 جنيه مصري إلى 4,000 جنيه مصري، ومرتب الشخص اللي عنده كذا سنة خبرة بيوصل لـ 8,500 جنيه، والموظفين اللي عندهم 10 سنوات خبرة ممكن يكسبوا أكتر من 15,000 جنيه.

2- العمل في فريق،  الشغل مع فريق بيفكر معاك وبتقسموا الشغل على بعض أكيد بيكون مريح وبيطلع أفكار مميزة

3- الترقية، العمل في الشركات بيكون في تطور معاه زيادة في المرتب طبعا، لكن العمل الحر مفيهوش حد يقيمك عشان تقدر تحدد تطور شغلك.

عيوب العمل بدوام كامل:

1- مفيش توازن بين العمل وحياتك الشخصية، حياتك بتبقي دايرة مقفولة ما بين رايح الشغل وراجع من الشغل و الـ 8 ساعات في المكتب ومفيش وقت تعمل أي حاجة تانية لسعادتك حني.

2- مفيش اختيارات، مش من حقك تختار المشروع اللي عايز تشتغل عليه في الشركة لكن مديرك هو اللي بيختار لك مهامك الوظيفية، بعكس العمل الحر اللي بتختار فيه الشغل اللي علي مزاجك.

3- أيام الأجازة محدودة، الموظفين ليهم 21 يوم اجازة مدفوع الاجر بس، بحسب قانون العمل.