قارن وقرر، باقة الـ 100 من فودافون، واتصالات، وارنج وWe!
تاريخ النشر: 04 فبراير 2021 قارن و قرر
جربت الباقة اللي بـ 100 جنيه من واحد من شركات الاتصالات؟
"الكارت أبو ١٠٠ بيقعد معاك قد ايه؟" تقريبا ده أكتر سؤال سمعناه طول الشهر اللي فات بعد ما انترنت الشركة قطع وكل واحد اضطر يشحن موبايله عشان يكمل شغل. المهم لما لقينا ان الموضوع ممكن يطول رحنا عيطنا للـHR وعشان الـHR الحنين رزق قرر يعمل اختبار عملي عن أرخص شركة اتصالات فى مصر وعلى أساسه هيحول كل الشركة على الخط ده.
طبعا زي العادي لازم يبقى في متطوعين، المرة دي كانوا ٤ كل واحد فيهم بيستخدم واحدة من شركات خطوط الموبايلات، كلهم نزلوا يشحنوا مع بعض ب ١٠٠ جنيه ويجددوا الباقة اللي ماشية مع المبلغ. وابتدينا نراقب فى صمت وهما بيستخدموا الباقة ونمسك لهم على الدقيقة والميجا. ,هنقارن فى الاخرمين هيوفر أكتر؟
اورنج VS فودافون VS اتصالات VS وي (الشركة المصرية للاتصالات)
WE Vs Etisalat Vs Vodafone Vs Orange
مسميات الباقات فى كل شركة مختلفة تماما، ده غير انها مش مظبوطة على ال١٠٠، ولا تقسيمة الوحدات على الميجابايت والدقايق.
الشحن ب١٠٠ جنيه هيديلك:
-Orange: باقة Control plus ٧٠
-Vodafone: باقة Flex Family ١٠٠
-Etisalat : باقة دماغ تانية
- WE: باقة تظبيط ٦٥
مين أوفر؟
سعر الدقيقة والميجابايت بالقرش:
-Orange: سعر الباقة: ٧٠ جنيه
سعر الدقيقة لخطوط اورنج: ٢ قرش
سعر الميجابايت: ١ قرش
-Vodafone: سعر الباقة: ١٠٠ جنيه
سعر الدقيقة لخطوط فودافون: ٢ قرش
سعر الدقيقة لخطوط تانيه: ١٠ قروش
سعر الميجابايت: اقل من قرش واحد
كل الباقات اللي ب١٠٠ تقريبا مخصصا انها تكمل الشهر
-Etisalat: سعر الباقة:١٠٠ جنيه
ليها تلات أنظمة بتحددها على حسب احتياجاتك:
(1) باقة ال ٨٠٠٠ ميجابايت و ٤٠٠ وحده:
سعر الدقيقة لارقام اتصالات: ٢٥ قرش
سعر الدقيقة لأرقام تانيه: ٩٠ قرش
سعر الميجابايت: ١ قرش
(2)باقة ال٧٠٠٠ ميجابايت و ٥٠٠ وحده:
سعر الدقيقة لأرقام اتصالات: ٢٠ قرش
سعر الدقيقة لأرقام تانيه: ٩٠ قرش
سعر الميجابايت: ١ قرش
(3)باقة ال ٣٠٠٠ ميجابايت و ٢٠٠٠ وحده:
سعر الدقيقة لأرقام اتصالات: ٥ قروش
سعر الدقيقة لأرقام تانيه: ٢٥ قرش
سعر الميجابايت: ٣ قروش
-WE: سعر الباقة: ٩٥ جنيه
سعر الدقيقة لخطوط وي: ٨ قروش
سعر الدقيقة لخطوط تانيه: ٤٠ قرش
سعر الميجابايت: ربع قرش
بحسبة بسيطة اتصالات بتقدم أوفر باقة، باقة دماغ تانية، لانك بتقدر تحدد اللي هتاخده من وحدات وميجا بايت على حسب احتياجاتك. بالنسبة للباقي فـ فودافون بـ ٥،١٠٠ فليكس واورنج بـ ٣،٠٠٠وحدة بيقدموا أحسن باقات للـ بيتكلموا كتير، وWE بتقدم أعلي باقة نت بـ ٢٠،٠٠٠ بأرخص سعر باقة، ۹٥جنيه، ودي المفضلة للـ بيستخدموا انترنت الموبايل كتير.
نبذة عن الشركات:
اورنج: اورنج مصر، تعتبر أول شركة خطوط موبايلات من سنة ١٩٩٨ فى مصر واتعرفت وقتها بإسم "موبينيل"، واتحول اسمها رسمية لأورانج في ٢٠١٦. شعارها هو: "اورنج أسرع شبكة في مصر"
فودافون: فودافون مصر، تاني شركة تدخل السوق المصري فى مجال الاتصالات، وبرضه بدأت سنة ١٩٩٨ وكان وقتها أسمها "كليك"، وتعتبر جزء من شركة الاتصالات العالمية "فودافون" اللي تأسست سنة ١٩٨٢ فى إنجلترا. شعارها هو: "فودافون القوة بين إيديك"
اتصالات: اتصالات مصر، تالت شركة فى مجالها فى السوق المصري، اتأسست سنة ٢٠٠٧ وهي واحدة من شركات مجموعة اتصالات الإماراتية اللي تأسست سنة ١٩٧٦. وتعتبر اتصالات مصر أول مشغل متكامل لخدمات الاتصالات في مصر. شعارها هو: "اتصالات اقوى شبكة فى مصر"
شركة WE: أو الشركة المصرية للاتصالات، هي الشركة الرسمية لخدمات الاتصالات في مصر، وأطلقت WE كرابع شركة لخدمات الموبايل فى مصر سنة ٢٠١٧. شعارها هو: "WE قبل أي حد"
قارن وقرر؟ هي مقالات التحدي بين تيم واحد قاعد بيجرب الابلكيشن اللي بنستخدمها فى حياتنا اليومية عشان يوصل لأوفر و أفضل خدمة، وكل التحديات عن تجربة حقيقة بالأسعار الحقيقية، قام بيها تيم فايدتي عشان يفيدكم و يساعدكم توفروا كل يوم.
