قارن وقرر مين يكسب؟ المنيوز ولا طلبات؟

زي كل يوم فى المكتب، الناس كلها مسكت فى بعض وخناقة: هنطلب أكل منين؟

فى اللي كان عايز يوفر واللي كان عايز يشيل إيدو من المسئولية واللي كان مستعجل وعايز يعمل اوردر من أي مكان، بس فى الاخر كلنا اتفقنا نطلب من المنيوز وطلبات، وبدأت المنافسة بين التطبيقين، طلبنا ٥ اوردرات من محلات مختلفة، كل اوردر مرتين، مرة من طلبات ومرة من المنيوز، والتحدي كان مين هيوفر أكتر؟  ومين هيوصل الأول؟ ومين اسهل ابليكشن فى الاستخدام؟

                         المنيوز VS طلبات

                      Talabat VS El Menus

مين أوفر؟

بعد جمع كل الاوردرات ودفع الفواتير لقينا أن المنيوز أرخص بحوالي ٧٠ جنيه عن طلبات  بعد ما استخدمنا الoffers  اللي عندنا، وفى مطعم واحد كان الحساب فيه واحد.

المنيوز: 

                    -إجمالي الحساب قبل الoffers: ٧٢٦ جنيه 

                    -إجمالي الحساب بعد الoffers: ٦٣٨ جنيه 

                    -وفرت: ٨٨ جنيه 

طلبات:

                    -إجمالي الحساب قبل ال offers:  جنيه ٧٢٣

                    -إجمالي الحساب بعد ال offers: جنيه ٧٠٨

                    -وفرت: ١٥ جنيه

المفاجأة انه كان فى مطعم بعت راجل واحد بالأوردرين، وده طبعا لما عرف ان في تشابه فى العنوان 

مين أسهل؟

الاوردرات كانت مختلفة ما بين بيتزا وساندوتشات و حلويات، وتقريبا اغلبيتنا حافظين شكل المنيوز وعارفين نجيب المطاعم والoffers عليه بسهولة مع أنه فى مطاعم كتير معندهاش خدمة الدليفري عليه، وده بعكس طلبات اللي لسه جديدة علينا لكن كل مطاعمها بتقدم الخدمة دي، وكمان عندها مطاعم مش مشهورة أوي بس عليها offers كويسة. ومابين ١٠ اوردرات كان في ٣ مطاعم عليها offers فى المنيوز ومطعمين فى طلبات، والعروض كانت متشابهة تقريبا، معدا أن فى عروض ليها مواعيد محددة فى اليوم على طلبات.

مين أسرع؟

على غير المتوقع أول أوردر وصل كان بيتزا ووصلت بعدها بنص ساعة بس من المنيوز والتانية جت بعدها بحوالي ربع ساعة، وبعدها بدأت توصل الاوردرات كلها ورا بعض، والأغلبية أخدت من نص ساعة لساعة الا ربع. فى مطعمين ووصلت من المنيوزالأول ومطعمين وصلوا من طلبات الأول، والمفاجأة انه كان فى مطعم بعت راجل واحد بالأوردرين، وده طبعا لما عرف ان في تشابه فى العنوان وده الوحيد اللي اخد ساعة عشان يوصل، وهو هو ده المطعم اللي كان حسابه واحد فى التطبيقين.

بصراحة الاتنين متشابهين جدا، الاختلافات كلها بترجع لمزاجك فى الأكل، ومتابعتك لل offers  وكمان تعودك على الابلكيشن.

نبذة عن الأبلكيشن:

المنيوز: ستارت أب مصرية من سنة ٢٠١١، اتشهرت فى البداية بسبب وجود منيوهات كل المطاعم المشهورة عليها واللي بيسهل اختيار المطاعم، وبعدها  بدأت في خدمة الدليفري.

طلبات: شركة كويتية من ٢٠٠٤، فروعها منتشرة فى الخليج العربي، ومن فترة قصيرة جدا اشترت شركة Otlob المصرية وحلت محلها فى السوق.

مين يكسب؟

هي مقالات التحدي بين تيم واحد قاعد بيجرب الابلكيشن اللي بنستخدمها فى حياتنا اليومية عشان يوصل أوفر و أفضل خدمة، وكل التحديات عن تجربة حقيقة والاسعار الحقيقية، قام بيها تيم فايدتي عشان يفيدكم و يساعدكم توفروا كل يوم.