أسعار رحلات سيوة 2022: أماكن الإقامة والأكل والفسح

خلاص داخلين على شهر أكتوبر والجو بقى فيه لسعة البرد الجميلة وحابين نروق على نفسنا ونرح مكان رايق، يبقى يلا بينا على سيوة.

تعالى نعرفك الأول على واحة الغروب، سيوة هي مكان هادى جدًا ورايق والطبيعة فيها لسة بكر ولو بصيت للسما هتشوف النجوم بكل وضوح فلو عاوز تفصل من الدنيا كلها والزحمة والدوشة اطلع قضيلك اسبوع هناك ومتخافش هنمشى معاك واحدة واحدة ونعرفك تعمل ده ازاى باقل التكاليف.

لو لسه ماصيفتش فالكلام دا ليك: بـ 100 جنيه بس قضي أحلى day use في صيف 2022

اين تقع واحة سيوة؟

سيوة أو زي ما بيتقال عنها واحة الغروب هى واحة مصرية موجودة في الصحراء الغربية وتابعة إداريًا لمحافظة مطروح وتبعد 560 كم من القاهرة و 50 كم فقط من الحدود الليبية.

أهل سيوة:

اهل سيوة معظمهم من الأمازيغ ولغتهم الأساسية هى الامازيغية، بيتعلمو العربي فى المدارس والأطفال هناك قبل سن المدرسة مش بيتكلمو عربى.

اهل سيوة بيتميزوا بالبساطة ومتمسكين بعاداتهم لابعد الحدود.

 عادات الزواج فى سيوة:

يا ترى ويجز كان يقصد ايه لما قال:

• - نويت اجيب جمار والماس
• - واقول يا عشق فى وسط الناس

هو ايه الجمار ده اصلا؟ وايه علاقته بحبيبته؟ والاهم من كده ايه علاقته بواحة سيوة؟

لو حظك حلو!

اهل سيوة بيتميزوا بزراعة النخيل واللى بيعتمدوا عليه كمصدر دخل اساسى، وعشان كده من عادات اهل سيوة فى الزواج ان الشاب بيقدم لحماته فى ليلة الفرح اغلى حاجة يملكها واللى هى قلب النخلة واللى بيسموه بالسيوى (الجمار) او (جمار النخل) وبيزينه بالورد والدهب على قد امكانياته وده علشان حماته تقدمله اغلى حاجة عندها اللى هى بنتها او حبيبته يعنى.

وعلى فكرة الجمار ده بيتاكل ولو حظك حلو اهل سيوة هييقدمولك منه.

اعرف كمان عن السفريات من هنا: سفريات ورحلات جوة مصر تقدر تروحهم بسهولة

تروح سيوة ازاى؟

ممكن تحجز اتوبيس غرب الدلتا القاهرة – سيوة

• بيطلع الساعة 10:30م من ميدان عبدالمنعم رياض، وكمان من التجنيد والترجمان في مواعيد مختلفة.
• ، الطريق بياخد من 12 لـ 14 ساعة وفى 3 ريست فى الطريق. ومن سيوة يوميًا 7:30 م
• والحجز فى نفس اليوم قبل السفر بساعتين من مكتب الحجوزات بالموقف.
• سعر التذكرة من سيوة للقاهرة والعكس 280 جنيه.
•  

كمان ممكن تروح مطروح الاول ومن هناك تاخد مواصلة لسيوة:

وعلشان توصل مطروح 

• ممكن تروح بقطر القاهرة مطروح الجديد، تذكرة القطر بين القاهرة ومرسي مطروح 150 جنيها للمكيف، و220 جنيها للنوم، القطر بياخد 8 ساعات لمطروح وبيعدى على محرم بك –اسكندرية.
• و ممكن تركب ميكروباص مطروح من مشعل -الهرم وده بياخد من 4 ل 6 ساعات يعنى اسرع من القطر لكن اكيد القطر مريح اكتر.

وصلت مطروح بالسلامة حاول تدور بقى على مواصلة تانية لسيوة ودى بتاخد حوالى 4 ساعات ونص كمان.

 لو هتروح بعربيتك:

• الطريق هياخد منك لسيوة 7 ساعات.
• بتاخد طريق العلمين - الساحل - مطروح - طريق سيوة علي طول وبياخد 3 ساعات بعد مطروح.
• وممكن بدل طريق العلمين طريق الضبعة وبيبتدي من أكتوبر.
• خلي بالك مافيش محطات بنزين علي طريق مطروح- سيوة، وآخر محطة هي محطة البنزين اللي في مدخل مطروح.

أماكن الاقامة:

حمد لله ع السلامة انت دلوقتي في سيوة، أول حاجة هتعملها هتروح ع الاوتيل او المكان اللى انت حاجزه للاقامة.

الاقامة فى سيوة متنوعة اوى وانت بتختار اللى يناسب ذوقك وميزانيتك ، وكمان الخدمات والمكان الموجود فيه الفندق، يعنى مثلا هتلاقى فنادق من اول 290 جنيه لحد 9000 جنيه فى الليلة ودى ارقام حقيقية.

فى انواع كتير من الفنادق فى سيوة منها 

• فنادق بيئية ودى بتكون مبنية من الكرشيف (مزيج الملح والطين) وده اللى بيتبنى منه البيوت السيوية
• كامبات
• فنادق عادية
• بيوت سيوية

اعرف اكتر عن اسعار وحجز الفنادق فى سيوة

الاكل فى سيوة:

الاكل السيوى لذيذ جدًا ويستحق التجربة.

• من اشهر الاكلات هناك بومردم ودى اكله من اصل ليبى عبارة عن اى نوع من انواع اللحوم خاصة الخروف بيتبل ويتدفن فى حفرة فى الارض ويتردم عليه بالرمل وعلشان كده اسمه بومردم وممكن يتسوى تحته انواع خضار مختلفة ورز كمان وده من الاكلات اللذيذة والمميزة هناك.
• فى كمان طاجن الفراخ بالزيتون واحسن مكان بيقدمه هو مطعم البابنشال وبيتقدم مع الرز ولازم كمان تجرب الملوخية السيوى .
• وطبعا مننساش المشاوى والمندى واللحوم عامة بيعاملوها معاملة مميزة بجد

الفسح والخروج فى سيوة:

سيوة فيها مزارات تاريخية كتير زى 

• قلعة شالى
• جبل الموتى
• معبد امون
• بحيرات الملح

• العيون الكبريتية
• جزيرة فطناس ولازم تحضر الغروب هناك.
• جبل الدكرور اللى بالمناسبة بيشهد اهم حدث فى تاريخ سيوة وهو عيد الصلح اللى بيكون كل سنة فى شهر اكتوبر وفيه بيتجمع اهل سيوة كلهم على جبل الدكرور لمدة 3 ايام بياكلو ويحتفلو ويباتو مع بعض واى زائر فى الوقت ده بيعدى عليهم بيكون ليه نصيب كبير من الكرم.

نيجى بقى لاحلى تجربة فى سيوة وهى الصحرا، مينفعش تزور سيوة ومتعديش ع الصحرا واللى هتعيش فيها اجمل تجربة سفارى و ساند بوردينج فى حياتك كمان هتزور منطقة بئر واحد وتنزل عين المياه الكبريتيه وعين المياه البارده فى وسط الصحرا.

وعلشان تقدر تدخل الصحرا لازم تعمل الحاجات دي:

 تصريح امنى فى مكتب المخابرات هناك للاشخاص والعربية اللى طالعة معاكو وبتدفع كمان اجرة العربية اللى بتكون حوالى من 3000 ل 4000 جنيه.

العربيات اللى بتدخل الصحرا بتكون  4x4 وبتكفى 7 افراد.

الانتقالات في سيوة:

المواصلات في سيوة بدائية شوية لكن هى تجربة مختلفة فلو مكنتش طالع مع منظمين او مش معاك عربية هتحتاج تتفق مع حد معاه وسيلة مواصلات ينقلك بين المزارات وبيكون معاك اليوم كله.

في مثلا:

• التروسيكل لو مشوارك خفيف وهو هيكون من التجارب المختلفة اللى هتجربها هناك.
• عربية سوزوكى بتشيل لحد 5 افراد وسعرها متوسط.
• ولو عددكم كبير يبقى تختارو ميكروباص 14 راكب وده هيوفر معاكم وبتتحاسب بالساعة او باليوم كله.

نصايح قبل ما تسافر سيوة:

1- الجو في سيوة صحراوي بامتياز يعني الصبح حر وبالليل تلج فخلي معاك شال أو جاكت للخروج بالليل.

2- متنساش المايوه علشان تنزل المايه براحتك .

3- لو عندك حساسية من الناموس يبقى لازم تشوف حل سواء دهان من الصيدلية أو أي طريقة بتريحك عشان الناموس هناك مبيرحمش.

4- ومتنساش تنزل تلف في السوق قبل ما ترجع القاهرة وتشترى بلح وزيتون وتجرب كمان مربى البلح والكركديه وكل حاجة تقريبًا عملوها مربى، وشاى الزردة مع حشيشة الليمون اللى هتكون ادمنته فى الكام يوم اللى فاته ومش هتقدر ترجع من غيره.