أماكن "سينما الشعب": التذكرة بـ 40 جنيه في عيد الفطر 2022

خلال أيام هيبدأ موسم أفلام عيد الفطر 2022 في السينمات المصرية، والأفلام اللي أعلنت رسميًا عن خوضها الموسم دا لغاية دلوقتي هي: "واحد تاني" – "أشباح أوروبا" – "زومبي" – "فارس" – "العنكبوت".

سينما الشعب بترفع شعار "سينما النهاردة بأسعار زمان"، وهيتعرض فيها في عيد الفطر 2022 فيلم "واحد تاني" لأحمد حلمي، وسعر التذكرة هيكون بـ 40 جنيه بس.

وزيرة الثقافة الدكتورة إيناس عبد الدايم أعلنت خلال الأيام اللي فاتت إن في مشروع اسمه "سينما الشعب" بيهدف لتقديم الأعمال السينمائية المعاصرة والحديثة بأسعار رمزية.

جبت كحك العيد ولا لسه؟ اعرف الأسعار من هنا: سعر كحك العيد 2022: العبد ولابوار وايتوال وبسكو مصر

معلومات أكتر عن سينما الشعب

سينما الشعب فكرتها إن أسعارها مناسبة لكل فئات الشعب والمواطن البسيط من خلال قصور وبيوت الثقافة المنتشرة في مختلف محافظات مصر.

مشروع سينما الشعب بيتم تنفيذه في دور العرض السينمائي اللي بتتبع الهيئة العامة لقصور الثقافة برئاسة المخرج هشام عطوة وبإشراف الفنان تامر عبد المنعم مدير عام الثقافة السينمائية.

امتى هيبدأ مشروع سينما الشعب؟

بداية من أول أيام عيد الفطر 2022، وهيكون موجود في 5 دور عرض في 4 محافظات.

أماكن سينما الشعب في مصر

بشكل مبدئي دي الأماكن اللي هيكون متاح فيها سينما الشعب:

• سينما قصر ثقافة قنا.
• سينما السادات.
• سينما شبين الكوم بالمنوفية.
• قصر ثقافة الأنفوشي بالإسكندرية.
• مكتبة البحر الأعظم بالجيزة.

دي المرحلة الأولى المتاحة حاليًا لكن بعد كدا هيتم تعميم الفكرة في مختلف أنحاء مصر، وهيكون متاح في سينما الشعب أفلام روائية قصير أو تسجيلية قصيرة من إنتاج وزارة الثقافة ممثلة في أكاديمية الفنون والمركز القومي للسينما والإدارة العامة للثقافة السينمائية.

وهيتم عرض الأعمال دي قبل بداية الفيلم السينمائي الرئيسي اللي بتقدمه شركات التوزيع الكبرى، ودا هيساعد في إلقاء الضوء على الأعمال المتميزة اللي بتنتجها وزارة الثقافة، وكمان غرض وزارة الثقافة من سينما الشعب المساهمة في نشر الوعى المجتمعي والأعمال المستقلة المتميزة.

المرحلة التانية من سينما الشعب (اخر شهر مايو الجاي 2022):

• سينما الشعب سيوة بمطروح.
• سينما الشعب هيبيس بالوادي الجديد .
• سينما الشعب دسوق.
• سينما الشعب كفر الشيخ بمحافظة كفر الشيخ.
• سينما الشعب شرم الشيخ بجنوب سيناء.

وهيوصل عدد السينمات إلى 15 سينما مع حلول عيد الأضحي المبارك في مشروع "سينما الشعب".