ازاي البترول بيأثر على الاقتصاد العالمي؟
تاريخ النشر: 28 يوليو 2020 قاموس الفلوس
ايه هي قوة البترول الحقيقية؟
البترول هو المادة الطبيعية المستخرجة من الأرض اللي بيتنج عنها البنزين، وغيره، وطبعاً العالم بيعتمد على الحاجات دي كوقود. بالرغم من إن في ناس وشركات كتيرة بتحاول تلاقي بدايل غير ملوثة للبيئة، إلا إن لغاية دلوقت، أغلب العالم لسة بيعتمد على البترول والغاز الطبيعي في تشغيل مولدات الكهرباء، والتدفئة وتشغيل المواصلات وغيره من الماكينات المهمة لاستمرار الحياة اليومية. عشان كدة البترول لسة بيأثر جامد على الاقتصاد العالمي.
إزاي سوق البترول متقسم؟
- بلاد منتجة ومصدرة للبترول
- بلاد مستوردة للبترول
سعر البرول بيأثر بطريقة مختلفة على كل مجموعة، فبالنسبة للبلاد المنتجة للبترول، سعره لما بيزيد، بيبقى له تأثير إيجابي على ميزانية الدولة بالرغم من إن المواطن العادي برضو بيعاني بسبب ارتفاع الأسعار، ولكن بالنسبة للبلاد المستوردة للبترول، فتأثير ارتفاع سعره بيبقى سلبي، وبيضر ميزانية الدولة.
التضخم
البترول بيدخل في أغلب الحاجات اللي بتمس حياة المستهلك اليومية، فأي حاجة بيتم استهلاكها بيتم نقلها، والنقل بيحتاج بنزين، واللي بيتأثر بارتفاع أو انخفاض سعر البترول، وعشان كدة البترول له تأثير مباشر على التضخم، فلما سعر البترول بيزيد، سعر كل المنتجات تقريباً بيزيد، وده طبعاً بيأثر على قوة شراء العملة بالنسبة للمستهلك، ولو عايز تعرف أكتر عن تأثير التضخم على حياتك، اقرا المقالة بتاعتنا عن التضخم.
لما سعر البترول بيزيد، سعر كل المنتجات تقريباً بيزيد، وده طبعاً بيأثر على قوة شراء العملة بالنسبة للمستهلك،
يعني ايه تضخم؟ اعرف أكتر من هنا: يعني ايه تضخم؟ وايه هي أنواعه
هل سعر البترول له علاقة بالركود؟
ارتفاع سعر البترول بيأثر بالسلب على المستهلكين، وبيخليهم مش قادرين يصرفوا كتير بسبب ارتفاع الأسعار، وده بيسبب إن حركة السوق تقل، وطبعاً ده ممكن يسبب ركود، ولكن على حسب خبراء الاقتصاد عشان البترول يتسبب في أزمة مالية لازم سعره يرتفع لفوق الـ100 دولار للبرميل، وإن العلاقة مش مباشرة للدرجة، وفي أغلب الأحيان سعر البترول ما بيبقاش المسبب الرئيسي للركود، ولكن واحد من العوامل المؤثرة.
تأثير سعر البترول على الصناعات التانية
البترول داخل في كذا صناعة تانية، زي مثلاً البلاستيك، والتشحيم، رصف الطرق، وهكذا ورغم إن الناس فاكرة إن الاعتماد على البترول في طريقه للإنتهاء، ولكن في الحقيقة، العالم معتمد اعتماد جامد على البترول لدرحة إن شركات زي جوجل وأمازون بيستخدموا الذكاء الاصطناعي عشان يعرفوا أحسن الأماكن للتنقيب فيها عن البترول.
تأثير سعر البترول على الوقود المتجدد
بالرغم من الضرر اللي بيسببه ارتفاع سعر البترول على أغلب المنتجات في السوق، ولكن التأثير على الوقود المتجدد بيبقى بالعكس، لإن الناس بتلجأ إلى الوقود المتجدد عشان يواجهوا ارتفاع سعر البترول.
