إيه هو جهاز حماية المستهلك؟

تاريخ النشر: في قاموس الفلوس

إيه هو جهاز حماية المستهلك؟

ازاي تضمن حقك وانت بتشتري إي حاجة؟

قانون حماية المستهلك هو عبارة عن شوية بنود لازم يلتزم بيها التجار، بتأكد على حماية المستهلك من أي غش ممكن يحصل من التاجر أو أي عيب يظهر في المنتج وقت البيع أو بعده. الموضوع مش بس في البيع والشرا عن طريق المحلات لأ كمان في الفترة الأخيرة جهاز حماية المستهلك بدأ يعمل قواعد لحماية المستهلك في "الأونلاين شوبينج"، وكل ده عشان يدي الحق للمستهلك انه يعرف كل تفاصيل وبيانات المنتج اللي هيشتريه وكمان بيديله الحق فى أنه  يقدم شكوى أو يرفع قضية على أي جهة قدمت له أي سلعة أو خدمة مغشوشة عن طريق جهاز حماية المستهلك.

 

ومن ضمن بنود قانون حماية المستهلك:

 

  • سعر المنتج لازم يكون ظاهر وواضح على كل منتج.
  • لازم كل الفواتير والايصالات والعقود تكون واضحة، سهلة القراءة وباللغة العربية.
  • المستهلك  لازم يبقى عارف كل البيانات الأساسية للمنتج، زي مكوناته وصفاته وسعره.
  • لو حجزت منتج أو خدمة من حقك تطلب إيصال يثبت الحجز.
  • ماينفعش أي مندوب يجيلك البيت عشان يعرض منتجاته من غير ما يقدم طلب أو ياخد تصريح منك.
  • ليك الحق تبدل السلعة أو ترجعها خالص وتاخد فلوسك بالكامل من غير ما تقول أي أسباب.
  • لازم التاجر أو المورد يكون عنده بيان صادر من جهاز حماية المستهلك متوضح فيه كل حقوق المستهلك، ويعلقه في مكان ظاهر.   

 

 

لو حجزت منتج أو خدمة من حقك تطلب إيصال يثبت الحجز.

 

 

ازاي اقدر اتواصل مع جهاز حماية المستهلك؟

 

لو حصل معاك اي مشكلة مع أي منتج أو خدمة وعايز توصلها لجهاز حماية المستهلك، الخطوات بسيطة جداً: 

  • تقدر تتصل بيهم عن طريق الخط الساخن (19588) وده بيغطي كل القاهرة الكبرى والاسكندرية.
  • وتقدر تملأ استمارة شكوى مجانية من أقرب مكتب بريد.
  • أو ممكن تبعت الشكوى اونلاين من هنا
  • وممكن كمان تشتكي عن طريق واتس آب على رقم 01281661880



 

اختار الطريقة الأسهل ليك، وهما هيطلبوا منك تبعت لهم صورة من فاتورة الشراء أو صورة الفاتورة ومستندات المنتج أو الخدمة اللي بتشتكي منها ومعاها بياناتك أو رقم الشكوى (في حالة أنك اتصلت بيهم هيدولك رقم للشكوى). وبعد كده بيتصل بيك محقق علشان يعرف منك التفاصيل كلها وخلال أيام قليلة هتوصلك رسالة ان مشكلتك اتحلت.