ايه النقط اللي محتاج تقارنها قبل ما تقدم على قرض؟

لما بتفكر تشتري أي حاجة غالية، بتحتاج تدور على تفاصيلها وتقارن بين كل نقطة فيها عشان تعرف تختار المنتج المثالي بالنسبة ليك، بس لو مفيش منتج مثالي؟ هتدور على المنتج اللي فيه المميزات المهمة ليك وعيوبه تقدر تستحملها. ما بالك بقى لو المنتج ده منتج بنكي، يعني فلوس وديون وموضوع كبير، ياترى هتسمع لأصحابك وتختار نفس المنتج اللي اختاروه من غير ما تقارن بنفسك؟ طيب ايه هي الحاجات اللي بتختلف من بنك للتاني ومحتاجة تتقارن قبل ماتقدم على قرض من البنك؟

1. سعر الفايدة:

أكيد دي أول حاجة لازم تقارنها، في البداية محتاج تسأل في البنك اللي مرتبك بيتحول عليه وتعرف سعر الفايدة اللي بيقدمها لشركتك/ وظيفتك، وبعدين تقارنها بباقي الأسعار في البنوك المختلفة. لأن في بنوك بتقدم أسعار فايدة وطرق للتقسيط مختلفة للعملاء القدماء عندهم ولبعض الوظايف، زي المهندسين والدكاترة.

2.  طريقة تحويل المرتب:

في بنوك بتشترط تحويل مرتبك عليها عشان توافق على قرضك، خاصة في حالة القروض الشخصية. وفي بنوك تانية بتحتاج بس تحول قسط القرض عليها في مواعيده، وده ممكن يأثر على سعر الفايدة على القرض. 

3. المصاريف الإدارية:

دي نسبة على مبلغ القرض بتتخصم من مبلغ القرض قبل ما تستلمه، عشان كده محتاج تدور على البنك صاحب أقل مصاريف إدارية.

في بنوك بتشترط تحويل مرتبك عليها عشان توافق على قرضك، خاصة في حالة القروض الشخصية

4. الغرامات ورسوم السداد:

لو اتأخرت مرة في السداد لازم تكون على علم بفترة السماح قد ايه والغرامة كمان هتكون قد ايه، وأكيد الأفضل تختار البنك الأقل غرامة وأكبر فترة سماح. 

خلي بالك كمان لو ناوي تسدد المبلغ كله قبل ما تخلص مدة القرض انك تعرف سعر الفايدة للسداد المبكر قد ايه وهتكون على مبلغ القرض كله ولا على المبلغ المتبقي بس، وفي بعض البنوك مش بعمل غرامة علي النوع ده من السداد.

5. الأوراق المطلوبة :

في بنوك بتحتاج أوراق كتير جداً عشان تديلك القرض وفي بنوك العكس تماماً، فـ شوف ايه البنك اللي معاك معظم أوراقه ومش محتاج لف كتير عشان تقدر تستلم قرضك في أقرب وقت ممكن، والخطوة دي كمان هتستريح فيها لو كده كده عميل في القرض.

وعشان نختصر عليك كل الخطوات دي تقدر تقارن كل الخطوات دي وتقدم دلوقتي على القرض الشخصي المناسب ليك علي موقع فايدتي في دقايق من مكانك.