ايه هو الحساب المشترك وتفاصيله وامتى تقدم عليه؟
تاريخ النشر: 30 نوفمبر 2021 قاموس الفلوس
ازاي تستفيد من الحساب المشترك
تفتكر ازاى البنك هيساعدك تحسب مصاريفك! ساعات بتبقى عايز تظبط المصاريف، و اللى في نفس الوقت بتشاركها مع حد قريب منك زي مراتك، وبتحتاج تجمع الفلوس اللى بتطلع ليك ولـ الطرف التاني كل شهر عشان تعرف تصرف وتحوش، تفتكر ساعتها ايه الافضل ليك ...تفتح حساب لوحدك ولا مشترك!
لو عايز تعرف خطوات فتح حساب في البنك ادخل هنا، ازاى تفتح حساب في البنك؟
يعني ايه حساب مشترك؟
هو حساب مصرفي بيكون مشترك بين شخصين أو أكتر، وفي الأغلب أي رسوم أو مصاريف إدارية بيحتاجها البنك بتتقسم بين الأطراف المشتركة في الحساب، والمعاملات البنكية اللى بتخص الحساب ممكن شخص واحد يمضي عليها أو الطرفين.
تفاصيل الحساب المشترك:
1- الحسابات المشتركة زي الحسابات العادية بالظبط، وممكن يتعمل الحساب المشترك بأكتر من طريقة:
- لو زوجين وعايزين تظبطوا مصاريفكم الشهرية مثلاً.
- لو أب وعايز يأمن مستقبل بناته، الحساب المشترك هيبقى أنسب حل ليه، عشان تربط المبلغ اللى عايزه في الحساب وبيبقى بأسماء بناته، وفي حالة الوفاة، المبلغ بيتقسم على حسب الشرع بين الأشخاص اللى محددهم في الحساب.
2- الحساب المشترك بيضم كل المنتجات البنكية زي:
- الودايع وشهادات الاستثمار
- الحسابات الجارية وحسابات التوفير
- بطاقات الائتمان
- القروض
قدم دلوقتي على قرض الشخصي اللي محتاجه مع فايدتي من مكانك!
ايه الصلاحيات اللى بيقدمها الحساب المشترك؟
في الحسابات العادية، الشخص بيكون مسؤول على كل حاجه في حسابه، التوقيع، والسحب، والايداع. لكن في الحساب المشترك، بتحدد الصلاحيات اللى عايزها، وبتكون حالتين:
منفرد :
يعني الشخص لوحده من حقه يمضى على أي حاجة تخص الحساب المشترك، ومش محتاج الأطراف التانية تكون موجودة، وطبعا ده بيتطبق على كل حاجة مش التوقيع بس.
مجتمع:
هنا الشخص ميقدرش يتصرف في أي حاجه في الحساب لوحده، ولازم يكون في طرف أو أكتر على حسب الاتفاق، عشان يقدر يمضى، أو يسحب مبلغ مثلاً.
ايه هى مميزات الحساب المشترك؟
- مفيد جدا للازواج اللى عايزين يبقى عندهم حساب واحد في البنك، ويحطوا فيه مرتباتهم عشان تسهل عليهم المصاريف الشهرية زي: الإيجار، والفواتير، وقسط القرض، ومصاريف الطوارئ، أو لو عايزين يعملوا حساب بأسم ابنهم/ بنتهم يحوشوا فيه.
- وكمان مناسب لكبار السن اللى ممكن يدخلوا في حساب مشترك مع حد ثقة ليهم ويعمل كل العمليات المصرفية بدالهم.
- ده غير انه مش بيمنع وجود حساب تاني شخصي لو عايز تستقل بجزء من مدخراتك بعيد عن الأشخاص اللي مشترك معاهم فى الحساب المشترك.
اعرف أكتر عن أسرار الحساب البنكي من هنا، هل ينفع شخص يفتح كذا حساب توفير أو جاري في بنك واحد؟
