لو معندكش بطاقة تموين:سعر وطريقة شراء العيش من مخابز التموين

كل اللي يخص الأسعار هتلاقيه في بلوج فايدتي، وعلشان كدا النهاردة هنقولك ايه هي طريقة شراء العيش البلدي من الفرن التابع للتموين بدون ما يكون معاك بطاقة تموين.

واحدة من أكتر الحاجات اللي شاغلة ناس كتير الفترة الأخيرة ايه هي طريقة شراء العيش البلدي لغير حاملي بطاقة التموين، كمل قراءة المقال واعرف كل التفاصيل اللي بتدور عليها.

ويا ترى ايه هي الشروط والسعر وكل حاجة هتلاقيها في السطور اللي جاية.

قرار وزارة التموين والتجارة الداخلية

حددت وزارة التموين والتجارة الداخلية

، شروط شراء العيش البلدي لكل المواطنين، بدون بطاقة التموين من أي مخبز بلدي خاصة لغير الحاملين للبطاقة التموينية.

والوزارة قررت تعمل كدا علشان توفر العيش البلدي للكل حتى للي مش معاه بطاقة تموين.

وكمان حامل بطاقة التموين بيكون من حقه كفرد واحد إنه يصرف 5 أرغفة بس يوميًا، وبالتالي ممكن يحتاج يشتري عيش بلدي بس برا بطاقة التموين.

ايه هي شروط شراء العيش البلدي من مخابز وزارة التموين؟

كلامنا خلال السطور الجاية هيكون شروط شراء العيش البلدي، لأي أسرة لا تحمل بطاقة التموين، من مخابز وزارة التموين المنتشرة على مستوى الجمهورية واللي عددها 33 ألف مخبز، والموضوع هيتم كالتالي:

• أن تكون الأسرة غير حاملة لبطاقة التموين.
• تشتري الأسرة كارت مسبق الدفع "مشحون" من أي مكتب بريد.
• رصيد الكارت المشحون لشراء الخبز تحدده الأسرة وفق احتياجاتها.
• يتم صرف الكارت المشحون في ماكينة صرف الخبز لدى المخبز البلدي وخصم قيمة عدد الأرغفة المصروفة للأسرة من رصيد الكارت.

كام سعر رغيف العيش البلدي لغير أصحاب البطاقات التموينية؟

وزارة التموين والتجارة الداخلية، صرحت إن سعر رغيف العيش البلدي اللي هيتم طرحه للمواطنين من غير حاملي البطاقات التموينية، هيكون أقل من سعر رغيف العيش الحر اللي بتبيعه المخابز السياحية، ومن المتوقع حسب تصريحات المسئولين إن سعر الرغيف هيكون أقل من جنيه.

اعرف كمان: ازاي تحدث بيانات بطاقتك التموينية على موقع دعم مصر؟

ازاي تحصل على الكارت المشحون لشراء العيش بدون بطاقة تموين؟

دلوقتي بعد ما عرفت الشروط والأسعار خلينا نقولك على طريقة شراء الكارت المشحون لشراء العيش بدون بطاقة تموين.

زي ما قولنالك قبل كدا الكارت المشحون دا هتقدر تشتريه من مكاتب البريد المصري، ولازم يتم شحنه أولًا بالقيمة اللي عاوز تحطها في رصيد الكارت.

ومن خلال الكارت المشحون دا هتقدر تشتري الخبز المدعم من المخبز البلدي طوال مدة توافر الرصيد المشحون.

اعرف كمان الفكرة اللي طرحتها وزارة التموين من فترة بخصوص عيش البطاطا من هنا: ازاي خبز البطاطا هيوفر مليون طن قمح سنويًا في مصر؟

قيمة شحن كارت صرف العيش

حسب التصريحات الصحفية المتاحة حاليًا خلينا نقولك إنه مفيش مبلغ معين يتم تقييد المواطنين به لشحن الكارت.

يعني قيمة شحن كارت العيش المسبق الدفع هي حرية المواطن، وتقدر تشحن الكارت بالرصيد اللي يناسبك.

وبعد ما تخلص الرصيد تقدر تشحن الكارت مرة تانية 

بداية النظام دا هيكون من امتى؟

 

من المنتظر أن تبدأ وزارة التموين والتجارة الداخلية، بداية من بكرة الأربعاء، 18 يناير 2023.

كمان وزارة التموين هتعلن بشكل رسمي قريب سعر رغيف العيش البلدي دون بطاقة التموين.

مواصفات رغيف العيش البلدي لغير حاملي بطاقات التموين

• طبيعي المذاق والرائحة.
• غير ملتصق الشطرين أو احتراقهما.
• قطر رغيف العيش لا يقل عن 18 سم.
• كامل الاستدارة والنضج.
• لا تزيد نسبة الرطوبة عن 36%.
• محتفظ عند نضجه بمظهره الدائري الطبيعي.
• مكتمل الاختمار.
• وزن رغيف العيش 90 جرام.