ليه استخدام الـ ATM والـ ITM ممكن يغنيك عن دخول البنك!

تاريخ النشر: في قاموس الفلوس

ليه استخدام الـ ATM والـ ITM ممكن يغنيك عن دخول البنك!

الـ ATM  ليها دور كبير في تسهيل معاملاتنا المالية اليومية، خصوصا بعد قرارات البنك المركزي الاخيرة في نهاية 2020 اللي كان من ضمنها مد السحب والاستعلام عن الرصيد ببلاش من أي ماكينة ATM حتى لو كانت ماكينة خاصة ببنك تاني غير اللي بتتعامل معاه.


 

يعني ايه ATM؟

 

ماكينة الصرف الآلى ATM هي جهاز إلكتروني بتوفر لعملاء البنوك إجراء المعاملات المالية في الأماكن العامة من غير مايضطروا يدخلوا البنك نفسه، كل اللي بيحتاجه العميل أن يكون معاه واحد من الكروت البنكية ويدخل رقمه السري اللي بيتكون من ٤-٦ حروف بس.


 

اعرف عن تاريخ الـ ATM من هنا.

 

تقدر تدفع الفواتير من الـ ATM خصوصا بعد مبادرة البنك المركزي " باي باي نقدية"


 

يعني إيه ITM؟

 

ماكينة الصراف التفاعلية ITM هي جهاز إلكتروني شبه الـ ATM  جدا بأختلاف وجود ميزة الصوت والصورة، اللي بيساعدوا العميل على القيام بالعملية اللي محتاجها من البنك. الماكينة فيها سماعة للودن عشان يتواصل العميل مع موظف البنك بسهولة وخصوصية، ده غير أن فيها ميزة التوقيع الإلكتروني، وتصوير بطاقة الرقم القومي، عشان يتأكد موظف البنك من شخصية العميل قبل ما يقوم بأي معاملات.


 

أول جهاز ITM  في مصر دخله البنك الأهلي المصري سنة ٢٠١٥ في فرعه الرئيسي علي كورنيش النيل، وبعده بنوك كتير بدأت تستخدمه.

 

حاجات ممكن تخلصها من مكن الصرف الآلي من غير ما تدخل البنك:
 

  •  الإستفسار على رصيدك في حسابك البنكي، التوفير أو الجاري.
  •  السحب من الحسابات البنكية، وبيختلف مبلغ السحب المسموح بيه في اليوم على حسب البنك.
  • إمكانية الإيداع في الحسابات الجارية والتوفير، وبرضه بيختلف مبلغ الإيداع المسموح بيه في اليوم على حسب البنك.
  • التحويل بين حساباتك المختلفة في نفس البنك أو بين أكتر من حساب في بنوك مختلفة.
  •  إمكانية إيداع الشيكات للبنك نفسه، أو لبنوك تانية، وبتوصل لـ ٢٠ ورقة شيك في المعاملة الواحدة.
  •  صرف الشيكات.
  • الاستفسار على القروض.
  • استبدال العملة.
  • إمكانية سحب الفلوس من أي مكان في العالم، بس هتحتاج تتأكد أن كارتك بيستخدم في البلاد دي من البنك بتاعك قبل ماتسافر.
  • دفع الفواتير، خصوصا بعد مبادرة البنك المركزي " باي باي نقدية".
  • ممكن كمان تدفع فواتير خطوط الموبايل أو تشحنه.
  • أهم حاجة هي إمكانية طبع إيصال بأي معاملة هتعملها.