يعني إيه أصول؟ وإيه أنواعها؟

التعريف البسيط للأصول هي كل حاجة تمتلكها الشركة أو حتى كل حق ليها عند الغير، وبتفيد أصحاب العمل أو المنشأة في تسديد الديون أو ينفع نحولها لفلوس كاش بسهولة . 

بس إمتى  نقدر نقول على حاجة إنها من أصول الشركة؟

لازم علشان نقول على اللي قدامنا ده من أصول الشركة ولا لأ يكون متوافر فيه 4 شروط:

1. يكون ملك للشركة بشكل قانوني وليها كل الحق للتصرف فيه في أي وقت.
2. يكون الأصل ده موجود علشان ليه منفعة اقتصادية لفترة زمنية ممتدة.
3. وجوده بيزود إنتاجية الشركة. 
4. نقدر نقيس العائد بتاعه على الشركة. 

مش لازم تكون الأصول الثابتة كلها حاجات ملموسة فيه كمان حاجات زي: العلامة التجارية، حقوق النشر أو براءة الإختراع وحتى شهرة الشركة وبتكون تحت بند الأصول غير الملموسة

وبتتقسم الأصول حسب طبيعتها والمدة اللي هتنتفع بيها الشركة وسهولة تحويلها لفلوس في مدة معينة:

الأصول المتداولة:

 هي ببساطة الحاجات اللي بتمتلكها الشركة وسهل التصرف فيها زي الكاش، والبضاعة في المخزن أو أي تكاليف أو مصاريف مدفوعة مقدماً وممكن تستخدم في دفع الفواتير أو شراء أي حاجة للشركة.

الأصول المالية:

 وهي كل اللي ليه علاقة بالناحية التمويلية في الشركة أو المنشأة زي الأسهم والسندات اللي بتستثمرهم الشركة في شركة تانية لأي غرض .

الأصول الثابتة:

وهي الحاجات اللي بيتم الإنتفاع منها على المدى الطويل أو على الأقل 3 سنوات مالية وبيكون صعب التصرف فيها أو بيعها علشان بتاخد وقت طويل زي: الأراضي، المباني، المُعدات والأجهزة. 

ومش لازم تكون الأصول الثابتة كلها حاجات ملموسة فيه كمان حاجات زي: العلامة التجارية، حقوق النشر أو براءة الإختراع وحتى شهرة الشركة وبتكون تحت بند الأصول غير الملموسة وهي من أساسيات الشركة وبيتم الانتفاع منها بس ملهاش وجود مادي ملموس .