يعني إيه ال E-commerce /التجارة الإلكترونية؟

التجارة الإلكترونية أو ال E-commerce مصطلح جديد ظهر فى بداية الالفينات مع التطور الالكتروني، وهوعبارة عن عملية البيع وشرا لأي نوع من المنتجات أو الخدمات عن طريق الوسائل الإلكترونية زي تطبيقات الموبايلات والانترنت. وباختصار هو تعريف الشوبينج وأي معاملات الإلكترونية.  وزاد انتشاره فى الفترة الاخيرة مع زيادة اتجاه التعاملات بالانترنت والدفع الإلكتروني. 

أشهر الشركات فى ال E-commerce فى مصر هي Souq و jumia، ده غير صفحات الفيسبوك والانستجرام اللي بقت بتبيع كل حاجة حرفيا.

ميزاتها:

من أهم مميزات التجارة الإلكترونية انك بتقدر تعمل شوبينج من موبايلك أو الكمبيوتر بتاعك  بسهولة من أي مكان

كمان بتقدر تطلب وتعمل أوردر فى أي وقت خلال ال24 ساعة وكمان تحدد الديلفري هيوصلك يوم ايه والساعة كام

طرق الدفع فيه سهلة وفي كذا اختيار، زي الكاش لما تستلم الاوردر وتتأكد منه، وطبعا فى طريقة الدفع الإلكترونية، لكن يفضل انك متستخدمهاش غير لو بتستخدم ويب سايت مضمون، عشان تتجنب أي سرقة فى رصيدك

تقدر تقارن بين المنتجات المختلفة وفرق الأسعار والعروض بسهولة قبل ماتقرر أحسن عرض بالنسبة لك

أنواعها:

ال E-commerce  ليها حوالي 6 أنواع، هي:

 الشركات مع الشركات Business to Business  B2B، هي المعاملات اللي بتحصل بين الشركات عشان يزيدوا من فرص بيع منتجاتهم

الشركات مع العملاء الأفراد Business to Consumer B2C، هو النوع المنتشر اللي بيعرض فيه التجار بضاعتهم باختلافها على الجمهور 

المستهلك مع المستهلك Consumer to Consumer  C2C، ده نوع ابتدا ينتشر قريب وبيبيع فيه المستهلك ممتلكاته لمستهلك تاني عن طريق طرف تاني زي  OLX

 المستهلك مع الأعمال  Consumer to Business C2B ، هو النوع اللي بيعرض فيها المستهلك منتجه على الشركات، ممكن يكون المنتج صور من تصويره أو تصميم جرافيك...إلخ. ومن أشهر الويب سايت فى المجال ده  Shutterstock 

الإدارة مع الأعمال Business to Administration B2A ، النوع ده انتشر مع الاتجاه للحكومة الإلكترونية E-government  وبقيت الشركات بتتعاون مع الحكومة عشان تقلل من التعامل بالكاش

المستهلك مع الإدارة Consumer to Administration  C2A، وهي المعاملات الالكترونية بين الافراد والإدارة زي الـ E-learning