يعني إيه سعر الفايدة ؟

كل ٤٥ يوم بيجتمع البنك المركزي علشان يقرر إذا كان هيثبت سعر الفايدة فى مصر أو هيغيرها، وده بيتحدد على حسب أهداف البنك المركزي للسوق والاقتصاد عامة، فلو هو عايز يشجع الناس إنها تحط فلوسها في البنوك، فغالباً هيقرر يعلي الفايدة.

لكن في نفس الوقت زيادة الفايدة ليها مردود تاني، وهو عدم قدرة المشاريع والشركات الجديدة على التقديم على قروض، وده معناه إنه بيقلل من الناس انه تفتح مشاريع جديدة لإنهم هيستنوا لغاية ما الفايدة على القروض تنزل، وعشان كده تقليل نسبة الفايدة بيحرك السوق أكتر، لأن الناس بتعرف إن فلوسها هيبقى ليها مردود أكبر لو شغلوها في مشاريع بدل ما يسيبوها في البنوك.

السؤال بقي هو يعني إيه سعر الفايدة ؟

سعر الفايدة هي الحسبة اللي بتتفق مع البنك عليها من البداية على نسبة الفايدة اللي بتزيد عليك فى حالة القروض والكريدت كارد وده غير نسبة الفايدة اللي بتطلعلك زيادة على فلوسك اللي عملها إيداع في حالة الودايع والشهادات.

و مصر فيها أكتر من نوع ل سعر الفايدة بيتغير على حسب المنتج البنكي.

القروض:

فى نوعين لأسعار الفايدة الخاصة بالقروض والكريدت كارد، هما السعر الثابت و السعر المتناقص، والفايدة هنا بتكون معظم الوقت سنويا، معدا الفايدة على الكريدت كارد لأنها شهريا.

-الفايدة الثابتة:

في الحالة دي المبالغ اللي انت بتدفعها مش بتأثر على طريقة حساب الفايدة، لأن بيتم حساب الفايدة من الأول على المبلغ الأصلي للقرض، وبعد كدة بيتم تقسيمها على مدة القرض.

-الفايدة المتناقصة:

هنا بقى الفايدة بتتغير على حسب المبالغ اللي بتدفعها لتسديد القرض، وبيتم حساب الفايدة كل شهر على حسب المبلغ اللي باقي تسديده، وعشان كدة نسبة الفايدة بتبقى كبيرة في الأول، وبعد كده بتقل تدريجياً.

حسيت بوجود فرق بين النوعين؟

أكيد لا، لأن مفيش فرق ما بينهم علشان الاتنين بيعبروا عن مبلغ فايدة واحد لكن بطريقتين مختلفتين للحساب، بتحتاج تتأكد بس قبل ماتقدم أي نوع أفضلك سواء كان على قرض أو كريدت كارد.

سعرالفايدة هي الحسبة اللي بتتفق مع البنك عليها من البداية 

شهادات الاستثمار والودايع:

سعر الفايدة على الودايع ثابت دايما مابيتغيرش، لكن بالنسبة لشهادات الاستثمار فليها ٣ أنواع، هما:

-الفايدة الثابتة: 

ده أمن نوع من الفوايد لأنه مبيتأسرش بأي تغير بيعمله البنك المركزي، وعشان كده استحالة يقل بس كمان استحاله يزيد.

-الفايدة المتغيرة:

ده بقي النوع اللي بيتغير كل شوية مع آخر تغير بيعمله البنك المركزي وبيعلي ويقل مع قراراته، وبعكس النوع الثابت ده فى مخاطرة كبيرة لأن ممكن السعر يقل فجأة.

-الفايدة المتراكمة:

 النوع ده مختلف شوية لأنك مبتقدرش تسحب الفايدة وقت نزولها، لكن بتستفيد كتير من الحركة دي لأنها بتتراكم مع المبلغ الأصلي اللي انت حاطه فى الشهادة و ده بيعلي المبلغ اللي بيتحسبلك عليه الفايدة.

ممكن تعرف أكتر من هنا عن الفرق مابين شهادات الاستثمار والودايع غير اتخلاف أنواع الفايدة عليهم.