يعني إيه ضريبة خدمة؟

تاريخ النشر: في قاموس الفلوس

يعني إيه ضريبة خدمة؟

هو احنا ليه بندفع ضريبة على الخدمات؟

كل ما الواحد بيروح كافيه ولا مطعم بيلاقي إنه بيدفع 26% زيادة على تمن الحاجات اللي هو طلبها ضرايب رغم إن ضريبة القيمة المضافة عاملة 14% بس، ولكن على كل فاتورة بتلاقي حاجة تانية إسمها ضريبة خدمة، بس يعني إيه؟ وهي تبع أنهي قانون؟

ضريبة الخدمة دي عادة بتبقى الـ12% اللي المطاعم والكافيهات بتحطها على الفاتورة في مقابل الخدمة اللي بيقدموهالك، والمفروض إنها بتغني عن البقشيش وفي نفس الوقت الفلوس دي المفروض بتروح للعاملين في المكان.

 

هل هي ضريبة فعلاً؟

 

رغم إن المطاعم بتسميها ضريبة خدمة أو service tax، الحقيقة هي إنها مش ضريبة فعلاً لإنها مش جزء من قانون الضرايب، ولكن مصدرها هو اتفاقية عمل جماعية  تبع وزارة السياحة ووزارة القوى العاملة، والحقيقة إنها إسمها رسم خدمة مش ضريبة خدمة. أول اتفاق على إدراج رسم الخدمة على الفواتير كان في 2003، والاتفاق كان على أساس إن الرسم ده بيروح لأجور العمال.

 

رغم إن المطاعم بتسميها ضريبة خدمة أو service tax، الحقيقة هي إنها مش ضريبة فعلاً لإنها مش جزء من قانون الضرايب

 

هل كل رسم الخدمة بيروح للعمال؟

 

على حسب آخر اتفاقية اللي تم توقيعها في 2013، وتم العمل بيها من 2014، المفروض إن 85% من رسم الخدمة بيروح للعمال وبيتوزع بالتساوي ما بين العمال اللي بيتعاملوا مباشرة مع الزباين زي الوايترز والريسابشنيست والعمال اللي مش بيتعاملوا مباشرة مع الزباين زي عمال المطبخ مثلاً، و15% منها بيروح لمكان العمل مقابل أي حاجة مفقودة أو تالفة. 

 

هل رسم الخدمة المفروض يتطبق على الكافيهات والمطاعم؟

 

الاتفاقية كانت تخص قطاع السياحة والمفروض إن تطبيقها بيبقى على الفنادق والمنشآت السياحية، والمفروض إنه غير قانوني بالنسبة للكافيهات والمطاعم، والإدارة المركزية للسياحة والمصايف نزلت رقم للشكوى 01289252668، وممكن ترفض إنك تدفعها وتهددهم بالتبليغ عنهم، أو ممكن تعتبرها البقشيش وماتدفعش بقشيش.