يعني إيه قروض شخصية وإيه هي أنواعها؟
تاريخ النشر: 11 نوفمبر 2020 قاموس الفلوس
إيه نوع القرض الشخصي المناسب ليك؟
القرض الشخصي هو نوع من القروض اللي بيقدمها البنوك للأفراد وبيكون القرض بدون ضمانات، وتتراوح مدة القروض الشخصية من سنة لـ ١٠ سنين.
ايه الفرق بين قرض السيارة، القرض الشخصي وقرض المنزل؟
الفرق هو أن القرض الشخصي مش بيكون بضمان أصول (الضمان الوحيد هو المرتب)، وقرض المنزل بيكون بضمان المنزل اللي اشتريته ومدة القرض بتوصل لـ٢٠ سنة، أما قرض السيارة فـ بيكون بضمان السيارة ولمدة أقصاها ٧ سنين.
وفى بعض أنواع القروض بتعتبر من أنواع القروض الشخصية:
-قروض النوادي: قروض عضويات النوادي معناها إنك ممكن تقسط اشتراك عضويتك في نوادي زي وادي دجلة والنادي الأهلي ومعظم نوادي القاهرة والإسكندرية بنسبة فايدة قليلة نسبياً، والتمويل ممكن يوصل لـ١٠٠% من قيمة العضوية، وده هيساعدك جداً لو عندك هواية وعايز تنميها أو تشترك لأولادك في نادي يقدّر مهاراتهم ويوظفها صح.
-قروض المدارس: هي القروض اللي بتمول الدراسة المدرسية والجامعية للطلاب، ونسبة قرض مصاريف المدارس يختلف من بنك لبنك وبيوصل فى بعض البنوك لـ١٠٠% من نسبة المصاريف.
نسبة الفايدة على القرض الشخصي بتختلف من بنك لبنك
ازاي اقدم على قرض شخصي؟
محتاج يكون عندك:
-ملف ائتماني إيجابي (i-score)
-حد الاقتراض الشخصي متوازن، بمعنى أن القرض اللي عايز تاخده زائد باقي التزاماتك البنكية لازم مايعديش ٥٠% من صافي دخلك.
الأوراق المطلوبة للتقديم على قرض شخصي بتعتمد على نوع وظيفتك والبنك اللي هيديك القرض، ودول الأوراق اللي بتكون دايما مطلوبة في كل البنوك:
-لكل الأشخاص بعيد عن اختلاف وظايفهم:
-بطاقة الرقم القومي أو جواز سفر
-إثبات للعنوان (إيصال مرافق)
-كشف حساب بنكي مختوم عن الفترة من ٣ لـ١٢ شهر (بتعتمد على البنك اللي بيقدم القرض)
-أوراق بتختلف على حسب الوظيفة:
-خطاب مفردات مرتب من الشركة (موضح به تاريخ التوظيف, صافى الراتب والمنصب الحالى)
-كارنيه نقابه
-شهاده مزاوله المهنه (اذا توفر)
-بطاقة ضريبية
-سجل تجارى
-بطاقة ضريبية
قبل ماتقدم على القروض الشخصية محتاج تعمل مقارنة بين البنوك فى مصر من خلال شوية نقط، هي:
-أنك تعرف سعر الفايدة على القرض.
-معرفة الحد الادني والاقصي لقيمة القرض
-المدة المحددة لتسديد القرض.
-الحد الأدنى للمرتب الشهري للعميل.
-قيمة غرامات التأخير.
إيه نسبة الفايدة على القروض الشخصية؟
نسبة الفايدة على القرض الشخصي بتختلف من بنك لبنك، وبتعتمد على كذا حاجة منهم إن كان المرتب بيتحول للبنك أو لا. وفي بنوك كتير بتوفر قروض مخصوصة للعملاء اللي مرتبهم بيتحول على حساباتهم في البنك، عشان ده بيضمن للبنك إنه يقدر يخصم القسط الشهري من مرتب العميل، وعشان كدة بيبقى نسبة الفايدة أقل من لو مفيش تحويل للمرتب.
وتقدر كمان تعمل مقارنة بين البنوك فى مصر من خلال استخدام حاسبة القروض الشخصية على موقعنا وهي هتوفر عليك انك تدور على البنك المناسب ليك ومعرفة كل الأوراق والبيانات اللي محتاج تجهزها قبل ماتقدم على القرض.
