يعني إيه محفظة إلكترونية؟

المحفظة الإلكترونية هي طريقة لحفظ وتحويل وصرف الفلوس إلكترونياً وهي عاملة زي حساب بنكي بس أونلاين، وعادة بتقدر تصرف فلوسك اللي في المحفظة عن طريق تطبيق أو جهاز إلكتروني زي تليفون أو جهاز كمبيوتر، والمحفظة الإلكترونية بتغني عن استخدام الكروت زي الكريدت كارد أو كارت الخصم المباشر في المواقع أو المحلات اللي بتقبل الدفع الإلكتروني.

إيه المكونات الرئيسية للمحفظة الإلكترونية؟

1. معلوماتك الشخصية

وده بيتضمن حسابك البنكي أو رصيدك الحالي وإسمك وطريقة لتأكيد هويتك زي البطاقة أو الباسبور.

2. البرنامج 

وده الكود المستخدم لتشغيل المحفظة، ومن أهم الصفات اللي لازم تبقى موجودة في المحفظة الإلكترونية هي الخصوصية، وده مهم عشان الواحد يضمن إن معلوماته الشخصية مش هيتم مشاركتها مع أي طرف تالت أو شركات برة معاملاتك المالية

المحفظة الإلكترونية بتغني عن استخدام الكروت زي الكريدت كارد أو كارت الخصم المباشر في المواقع أو المحلات اللي بتقبل الدفع الإلكتروني.

أمثلة المحافظ الإلكترونية:

1. Apple Pay و Google Pay

لو عندك أيفون أو تليفون أندرويد، يبقى تقدر تستخدم المحافظ الإلكترونية المقدمة من شركة أبل وجوجل.

2. المحافظ الإلكترونية البنكية

حالياً في مصر، بنوك زي البنك الأهلي والبنك التجاري الدولي وQNB عملت محافظ إلكترونية تقدر تستخدمها من حسابك، ويمكن أهم صفة في المحافظ دي إنها تخضع لقوانين وقواعد الخصوصية ومشاركة البيانات اللي تخضع ليها البنوك، وعشان كدة ممكن تكون أكتر آماناً من محافظ تانية، وكل اللي محتاجه عشان تسجل فيها هي الرقم القومي ورقم المحمول اللي متسجل على الرقم القومي.

3. فوري

شبكة فوري ممكن تكون واحدة من أكبر الشبكات اللي موجودة في مصر لتحويل الفلوس، والشركة ابتدت من 2008، ومؤخراً ضافت الأوبشن بتاع المحفظة الإلكترونية بعد ما كانت خدمتها بتعتمد على تحويل الفلوس بس. وأغلب البنوك بتعتمد على شبكة فوري في إيداع وتحصيل الفلوس اللي موجودة في المحافظ الإلكترونية بتاعتهم.