إزاي تحدد مصاريفك وتظبط ميزانيتك مع الميزانية الصفرية؟

تاريخ النشر: في نصايح ببلاش

إزاي تحدد مصاريفك وتظبط ميزانيتك مع الميزانية الصفرية؟

اتعامل مع ديونك ومصاريفك ومدخراتك بشكل افضل.

كل شهر بتقع في مشكلة إنك مش بتعرف تظبط مصاريفك، وبتضيع نص مرتبك على حاجات ملهاش لازمة، وللأسف بتتزنق على اخر الشهر، بس فيه طريقة بسيطة لو استخدمتها هتظبط مصاريفك هى" الميزانية الصفرية".

 

ايه هي الميزانية الصفرية؟

 

هى طريقة بتستخدمها عشان تظبط مصاريفك، ويفضل دخلك ثابت لفترة معينة، وكمان مناسبة للمؤسسات اللى بيحصلهم ارتفاع في معدل الإنتاج، والميزانية الصفرية بتساعد الشركة تحسب التكاليف الثابتة والمتغيرة كل شهر.

 

هى طريقة هتساعدك تحدد 3 حاجات من دخلك:

 

  • المصروفات
  • المدخرات
  • الديون

والهدف من الطريقة دي إن في أخر الشهر لو عملت الدخل ناقص النفقات المفروض يطلع الناتج بيساوي صفر، وممكن تعيد الطريقة كل شهر أو تدخل كذا شهر في بعض لو هتمشي على نفس النظام لمدة كذا شهر ورا بعض.

 

طب ازاى تطبق الميزانية الصفرية؟

 

  • اعرف دخلك!

لازم تعرف بالظبط دخلك الشهري، لو هينقص أو هيزيد عليه أي حاجه، او مثلا اشتغلت حاجة Freelance ودخلك فلوس اضافية. كل ده لازم تعرفه كويس عشان تعرف ايه الفلوس اللى هتبدأ بيها الشهر.

 

الهدف من الطريقة دي إن في أخر الشهر لو عملت الدخل ناقص النفقات المفروض يطلع الناتج بيساوي صفر

 

  • تابع مصاريفك!

لازم تاخد بالك من مصاريفك الشهرية، وتشوف هل كده مظبوطة ولا لأ؟ أو هتحتاج تنقص مصاريفك من حاجه معينه وتزودها في حاجة تانية.

 

  • حدد أنواع النفقات!

قبل ما تبدأ تصرف في أي حاجة لازم تصنف النفقات وتعرف كل حاجة بتصرفها هتدخل فى انهى نوع بالظبط، يعني مثلا لو هتدخل بند جديد زي السفر يبقى لازم تزوده.

 

مثال الميزانية الصفرية:

 

لو دخلك الشهرى 3,000 جنيه، الميزانية ممكن تمشي يالشكل ده

1- الايجار 500 جنيه

2- الكهرباء 150 جنيه

3- الغاز 50 جنيه

4- قسط الكريدت كارد 500 جنيه

5- قسط قرض العربية 500 جنيه

6- قسط التأمين 300 جنيه

7- مصاريف الأكل والشرب 800 جنيه

8- الطوارئ 200 جنيه

وطبعا ده مجرد مثال وممكن يتغير على حسب مصاريف كل شخص واحتياجاته.

 

مميزات الميزانية الصفرية:

 

  • هتعرف ايه كمية الفلوس اللى داخله وخارجه كل شهر، ومش هتصرف أكتر من اللى معاك.
  • الميزانية قابلة للتخصيص بمعنى ان مفيش عدد معين من المصروفات.

 

وفيه طريقة تانية شبهها ممكن تعرف تفاصيلها من هنا، ايه هى طريقة الـ 50 -30- 20 اللى بيتقسم بيها المرتب؟