إزاي تحقق أهدافك للسنة الجديدة من غير ما تبوظ ميزانيتك؟

بداية السنة الجديدة معناها أهداف جديدة لحياتك، بس طبعاً كل هدف بيبقى له متطلبات وساعات الواحد بيفتكر إن المتطلبات دي لازم يتصرف عليها كتير، وعشان كدة في ناس كتير بتفشل تحقق أهدافها من أول شهر. في المقالة دي هتلاقي أمثلة لأهداف عامة كتير مننا بيحاول يحققها خلال السنة، وطرق موفرة ممكن تساعدك.

هدفك أنك تبقى رياضي ونشيط:

أكيد أول حاجة هتخطر في بالك، انك تشترك في الجيم، ولكن ده مش شرط. في حاجات كتير ممكن تساعدك تتمرن من غير ما تصرف فلوس:

1. ممارسة رياضة الجري أو المشي في الشارع.
2. الإشتراك في مجموعات رياضية إجتماعية زي Cairo Runners أو Cairo Hiking على صفحات التواصل الإجتماعي.
3. استخدام YouTube للتمرين في بيتك.

ممكن تلاقي اللي بتدور عليه أرخص كتير علي الانترنت خصوصا الYouTube

هدفك إنك تتعلم لغة جديدة:

الطريقة التقليدية عشان تتعلم لغة جديدة هي التسجيل في كورسات، بس أنت ممكن تتعلم أي لغة نفسك فيها بطرق بسيطة وغير مكلفة:

1. استخدم تطبيقات زي Duolingo وBabelFish
2. اكتشف مجتمعات تساعدك تتعلم اللغة الجديدة زي MylanguageExchange.com وInterpals.net
3. اتفرج على مسلسلات وأفلام باللغة اللي أنت عايز تتعلمها بس تكون مترجمة

هدفك إنك تقضي وقت أكبر مع أصدقائك

طبعاً ده أكتر هدف ممكن يبهدل ميزانيتك لإنك هتخرج كتير وتصرف كل مرتبك على الكافيهات والمطاعم، بس في طرق تانية ممكن تساعدك:

1. انزل اتمرن معاهم، وكدة تكون حققت هدفين مرة واحدة.
2. اعزمهم عندك في البيت.

في الآخر، أنت ممكن تحقق أي هدف أنت نفسك فيه من غير ما تصرف فلوس كتير، كل اللي عليك تعمله إنك تلاقي طرق تناسب حياتك وميزانيتك.