ازاي تبقي صاحب Startup ناجحة: الفكرة!

بما أن الشركات الناشئة أو المعروفة عالمية بـ Startup زادت جدا في الفترة الأخيرة مع زيادة إقبال الناس على استخدام الأبلكيشن والويب سايت اللي بتنتج عنها، وحب الشباب لبداية مشروعاتهم الناشئة الجديدة، هنقولك في سلسلة مقالات إزاي تقدر تمتلك Startup ناجحة، والخطوات اللي محتاج تعملها.

 أجيب منين الفكرة؟

المشروع أصلا فكرة، محتاج توصلها عشان تقدر تبني باقي الخطوات على أساسها، ممكن أصلا تبقي عايز تبدأ مشروعك عشان عندك فكرة وممكن يبقي نفسك تكون رائد أعمال entrepreneur بس لسه موصلتش لفكرة، في الحالة دي هنساعدك ونقولك أنواع الأفكار اللي ممكن تختار منها.

أنواع الأفكار:

1-الفكرة دي ناقصة في السوق:

في كل الأحوال خلينا متفقين ان المشروع لازم يكون بيخدم أكبر كمية من مجتمعك يا أما مش هيكون عندك جمهور، ونسبة نجاحك هتكون ضعيفة، فلازم تعمل أبحاث عن سوق المشروع اللي عايز تبدأ فيه فى محيط مجتمعك وتتأكد إذا كان في فرصة تدخله ولا السوق مش محتاجك.

2-الفكرة العفوية:

الفكرة دي ملهاش معاد، تبقى سايق وتغني وفجأة تيجي في بالك، وفي الغالب بتكون خدمة هتساعد في تسهيل حياة الناس اليومية وبتجيلك بسبب أحساس أنك عايز تحل مشكلة بتقابلك كل يوم.

المشروع أصلا فكرة، محتاج توصلها عشان تقدر تبني باقي الخطوات على أساسها

3-هواية:

ممكن هوايتك تبقي مشروع، حتى لو الهواية دي أعمال يدوية شاطر فيها، هتحتاج تعمل لها ستوديو أو ورشة وتجمع فريق شاطر ويبدأ المشروع.

4-عندك خبرة في إيه؟

 دور على فكرة في مجال خبرتك، لأن في الحالة دي مش هتكون جديد على السوق، ولا هتحتاج تعمل علاقات واتصالات من أول وجديد.

5-طور في القديم: 

لو في فكرة مطروحة فعلا في السوق بقلها فترة بس حاسس أنك تقدر تعملها بشكل متطور أكتر وتتميز فيها يبقي ليه لأ، خصوصا أن في شركات عالمية بدأت بالطريقة دي وأكلت السوق من الشركات اللي سبقتها كمان. 

من الشركات دي: 

Facebook بعد MySpace

Gmail بعد Yahoo و Hotmail