ازاي تكسب فلوس من السفر في 4 طرق؟
تاريخ النشر: 15 مارس 2021 نصايح ببلاش
رجع فلوس الاجازة وحوش من تاني
حجزت لرحلة قريب ولا لأ، الرحلات فى الموسم ده بيكون ليها جمال مختلف عشان معظمها بيبقي مغامرات وده بيخليها أغلى من السفريات العادية. تخيل بقى لو تقدر تسافر وتتفسح ولما ترجع تكسب فلوس تعوض بيها اللي دفعته فى السفرية، هنقولك على شوية طرق ممكن تجربهم بعد رحلتك الجاية.
- بيع صورك:
لو مجنون تصوير خصوصا للأماكن الطبيعية والأثرية والشوارع تقدر تبيع صورك دي حتي لو مصورها بالموبايل على أكتر من أبلكيشن مخصصين لده، أشهرهم Shutterstock وفي كمان Twenty20 و Istock و Fotolia و Alamy، والصور بتتباع عليهم بالدولار.
- احكي عن الرحلة:
ليك فى الكتابة وبتعرف تحكي بأسلوب لذيذ؟ طيب ماتجرب تحكي عن رحلتك، المغامرات اللي عملتها وأسعار التذاكر هناك وعن أهل البلد وعاداتهم. ممكن تجرب تبعت لواحد من الويب سايت المشهورين فى المجال ده زي Safareya أو ممكن تبدأ فى بلوج بتاعك على Wordpress أو Blogger لو ناوي تكمل فى الكتابة، ومع الوقت هتقدر تكسب من الاعلانات.
ممكن تشتري حاجات مشهورة بيها المدينة أو المنطقة اللي هتزورها وتبيعها أونلاين لما ترجع
- وثق رحلتك:
أما بقي لو كنت من مجانين تصوير الفيديو فممكن تستخدم فيديوهاتك فى الرحلة عشان تحكي بيها كل اللي حصلك هناك بالصوت والصورة، ممكن تعمل قناة على الـ Youtube وتكسب من ال views والاعلانات عليها، أو ممكن تنزل فيديوهات على Instagram وتحول الاكونت بتاعك لـ Business وتبقي influencer سفر.
- بيع اونلاين:
لو ليك فى البيع الاونلاين أو تعرف واحد صاحبك ليه فى الشغل ده، ممكن تشتري حاجات مشهورة بيها المدينة أو المنطقة اللي هتزورها وتبيعها أونلاين لما ترجع، بس ماتنساش تزود مكسبك من العملية دي وتعرف قبل ماتسافر إذا كانت المنتجات دي مطلوبة فى مدينتك ولا لأ.
