اعرف أكتر 6 طرق بسيطة لاستثمار فلوسك وتحقيق عائد منها

لو عندك فلوس زيادة مش محتاجها، ممكن تكون بتفكر تستثمرهم في حاجة تجيبلك دخل زيادة، ولكن إنك تعرف إزاي وفين تستثمرهم ممكن يكون مربك شوية، عشان كدة هنقولك على 6 طرق سهلة تستثمر فيهم فلوسك.

1- وديعة أو شهادات استثمار

بالنسبة لاستثمار النقدي، فالودائع وشهادات الاستثمار هي الأقل مخاطرة، لإنك بتحط فلوسك في البنك، وبتبقى ضامن نسبة فايدة معينة بتنزلك على حسب خطة السداد مع البنك، وعادة البنك بيبقى مأمن على النوع ده من الاستثمار.

2- ذهب

الذهب ممكن يكون أسهل طريقة لاستثمار فلوسك، وبرضو أضمنهم، ولكن طبعاً الذهب مش هيجبلك عائد غير لما تيجي تبيعه، وعشان كدة بيعتبر استثمار طويل الآجل. ميزة الذهب الأساسية هي إنه قيمته فيه، ولإنه مش مجرد أرقام على شهادة أو شاشة، ولكن يعتبر سلعة، فهو مافيهوش مخاطرة تقريباً، وطبعاً تقدر تبيعه في أي مكان وتستفيد منه.

3- الاستثمار العقاري

العقارات دايماً استثمار كويس، ولو أنت حابب تجيب دخل على طول، ممكن تشتري عقار بهدف تأجيره، وده هيبقى أسرع طريقة عشان تجيب دخل من استثمارك العقاري، ولكن لو أنت مش مستعجل، يبقى ممكن تشتري في منطقة رخيصة شوية، وبعد كدة تبيعها بعد كام سنة.

ممكن تشتري عقار بهدف تأجيره، وده هيبقى أسرع طريقة عشان تجيب دخل من استثمارك العقاري.

4- البورصة

بالرغم من إن البورصة مخاطرتها كبيرة، إلا إن العائد عليها بيبقى برضو كبير، وممكن تستثمر مبالغ صغيرة فيها عشان الخسارة ما تبقاش كبيرة. أحسن حاجة تعملها إنك ما تحطش فلوسك في شركة واحدة، ولكن توزعهم على كذا شركة، وطبعاً قبل كدة، تكون دارس كل شركة، وتشوف أنهي شركة هتنمو وتتطور أكتر في المستقبل القريب. وميزة الاستثمار في البورصة هي إنه استثمار قصير الآجل.

5- صناديق الاستثمار المشتركة 

نفس فكرة البورصة، بس مخاطرتها أقل شوية من الاستثمار المباشر لإن الصندوق بيتم إدارته بواسطة خبير، واللي بينوع نسبة المخاطرة، ونوع الأسهم اللي بيستثمر فيها.

6- السندات

السندات بتعتبر استثمار مخاطرته قليلة بالنسبة للبورصة، وهي عبارة عن إنك بتسلف الحكومة فلوس (زي قرض)، وبعد كدة الحكومة بتردلك الفلوس وعليها نسبة فوايد، عادة من 12-14%، والسندات مدتها بتختلف على حسب نوعها.