ليه محتاج تدور على Internship/ فترة تدريب في الصيف؟

فكرت تدرب عملي فى اجازة الجامعة؟ أو محتار من دلوقتي فى اختيار المجال اللي هتشتغل فيه؟ تبقي محتاج تقدم على Internship الأجازة دي.

تاريخ الـ Internship!

ظهر مصطلح الـ Internship أو التدريب الصيفي في نهاية القرن الـ 20، واتنفذت الفكرة في الأول على طلبة كلية الطب سنة 1920، وده عشان يطبقوا اللى بيدرسوا وخاصة في أخر سنة وبيكون تحت إشراف الدكاترة بتاعتهم، ومع مرور السنين انتشرت الفكرة في كليات تانيه، وزادت نسبة المتدربين من طلبة الجامعات حوالي 77% في سنة 1999.

ليه محتاج تقدم على Internship على الأقل مرة قبل ما تتخرج من الجامعة؟

1- ظبط الـ CV!

لو لسه طالب فـ أكيد بتواجه مشكلة وانت بتعمل الـ CV بتاعك، ومش عارف تكتب فيه ايه! بس لما تاخد أكتر من تدريب ده هيزود من خبرتك وبالتالي هتملي الـ CV، وده هيساعدك تبقى مؤهل لـ سوق العمل، وتقدم بثقة على الوظايف بعد التخرج.

لو عايز تعرف أكتر عن سوق العمل، اقرأ هنا يعني إيه سوق العمل، وإيه هي أنواعه ومكوناته الأساسية؟

2- علاقات!

التدريب الصيفي في أي شركة بيساعدك تكون علاقات مع ناس في أقسام مختلفة، وده هيزود ثقتك بنفسك، وهيخلق ليك فرص للشغل في المستقبل.

3- هتخلص شغلك في الميعاد!

الـ Deadlines من أكتر الحاجات اللي بتسببلنا ضغط كبير في المذاكرة و تسليم المشاريع، وكمان الشغل، والتدريب اللى هتاخده هيعودك تخلص شغلك في الميعاد االلي اتحددلك وتعمل حساب للوقت.

4- اختار طريقك!

يفضل تاخد Internship في  شركات مختلفة، وتشتغل أكتر في اختصاصك وتطبق اللى بتاخده في الكلية، لان ده هيساعدك تختار الكارير المناسب ليك بعد التخرج.

.التدريب الصيفي في أي شركة بيساعدك تكون علاقات مع ناس في أقسام مختلفة، وهيزود ثقتك بنفسك

أشهر الأماكن اللى بتقدم Internship في مصر 2021:

• شركة اورانج/ Orange 

تدريب في مجال الموارد البشرية، والتمويل، والمحاسبة

• شركة  PepsiCo

تدريب في مجال الموارد البشرية، والتمويل، وهندسة الحاسوب

• شركة نوكيا / Nokia

تدريب في مجال الحاسبات والمعلومات، وهندسة الاتصالات، وهندسة ميكانرونكس

• بنك مصر

التدريب متاح لـ كليات: تجارة بكل أقسامها، وحقوق، وهندسة، وحاسبات ومعلومات

• بنك القاهرة

التدريب متاح لـ كليات: تجارة بكل أقسامها، وحقوق، وهندسة، واقتصاد وعلوم سياسية