ليه نجيب ساويرس بيفضل الاستثمار في الدهب؟

من وقت ما العالم اتعرض لجائحة كورونا وبقى الكل خايف من موضوع الاستثمار، واستثمر فلوسي في ايه بأقل الخساير وبدون مخاطر؟! أكيد كورونا أثرت في صناعات كتير جدًا وفي الاقتصاد عمومًا لكننا بنحاول نساعدك دايمًا انك تاخد الخيارات السليمة، وعلشان كده بنقدملك نصيحة واحد من أنجح رجال الأعمال في مصر والعالم.

الملياردير المصري نجيب ساويرس، في حوار تليفزيوني قبل كدا، قال إن الاستثمار في الدهب الخيار الأفضل حاليًا خاصة مع معاناة العالم من التضخم.

طب هو يعني ايه تضخم؟

التضخم هو نسبة ارتفاع أسعار السلع والخدمات في خلال فترة زمنية محددة، وبيأثر على القوة الشرائية للعملة، وده معناه إن كل ما نسبة التضخم بترتفع، كل ما العملة بتفقد قيمتها، فلو بتقدر تشتري 5 منتجات بنفس القيمة، مع التضخم العدد ده بيقل.

اعرف أكتر عن التضخم من هنا، يعني إيه تضخم وإيه هي أنواعه؟ 
 

 نجيب ساويرس بيقولك حاول تعمل زيه وتستتثمر  في الدهب وتخصص جزء أكبر من محفظتك فيه .

خبرة عملية من ساويرس!

في العموم بيتقال إن الاستثمار في الدهب آمن إن المستثمر يحط فيه فلوسه بنسبة 5% لـ 10% من محفظته لكن نجيب ساويرس بيقولك إن عنده خبرة طويلة في الاستثمار في الدهب علشان كده حاول تعمل زيه وتخصص جزء أكبر من محفظتك في الدهب.

ساويرس بيأكد لك إنه من الأفضل الاستثمار في الدهب بنسبة 20 إلى 30 % من محفظتك، وهو شخصيًا أنشأ صندوق لتعدين الذهب بقيمة 1.4 مليار دولار في الفترة الأخيرة وكمان جزء كبير من صافي ثروته من الدهب. (التعدين فكرته بتعتمد على توسيع المناجم وتطويرها)

الدهب أمان أكتر!

نجيب ساويرس، رئيس مجلس الإدارة والرئيس التنفيذي لشركة أوراسكوم للاستثمار القابضة، أكد أن الدهب  أكتر أمان من الاستثمار في أي حاجة تانية ومخاطره أقل في ظل الانهيارات الاقتصادية في مجالات كتير.

الدهب عمره طويل في السوق!

ساويرس بيقول إنه عاوز ينام وهو مستريح في ظل حالة عدم الاستقرار الاقتصادي علشان كده بيحاول ياخد أكتر القرارات الآمنة بأقل مخاطر ممكنة.

ومن المتوقع أن أسعار الفايدة المرتفعة هتتعافى في وقت ما ووقتها هتاكل مكاسب الدهب لكن في نفس الوقت الدهب مستثمر عمره طويل في المعادن وفي السوق الاقتصادي عمومًا.