ياترى فكرة كويسة إنك تقدم على قرض شخصي عشان تسافر؟ | فايدتي

ياترى فكرة كويسة إنك تقدم على قرض شخصي عشان تسافر؟

تاريخ النشر: في نصايح ببلاش

ياترى فكرة كويسة إنك تقدم على قرض شخصي عشان تسافر؟

السفر له سبع فوايد، بس هل يستاهل تتداين بسببه؟

ساعات الواحد بيبقى هيموت على أجازة، ولكن ظروفه المالية ماتسمحش، واليومين دول بنوك كتير بتعلن عن إمكانية استخدام القرض الشخصي في تمويل سفرية حلوة، بس هل دي فكرة كويسة؟

الحقيقة هي إن الواحد مش مفروض يتداين لأي حاجة ما تعتبرش ضرورية، وعشان كدة هتلاقي أغلب الخبراء الماليين بينصحوا بعدم التقديم على أي قروض لو الموضوع مش ضروري وحتمي، وأغلب الناس بتشوف إن السفر ده رفاهية، وإن الواحد مش محتاج يسافر أصلاً.

في نفس الوقت، لو أنت مصمم، يبقى لازم تعرف العيوب والمميزات.

 

المميزات:

 

  • في بعض الأحيان، القرض الشخصي بيبقى نسبة الفايدة عليه أقل من نسبة الفايدة اللي على الكريدت كارد.

 

  • القرض بيتسدد في شكل أقساط شهرية ثابتة، فهتبقى عارف أنت المفروض تدفع قد إيه كل شهر، غير الكريدت كارد اللي التسديد بيبقى على حسب الصرف ونسبة الفايدة على الفلوس اللي صرفتها.

 

أغلب الخبراء الماليين بينصحوا بعدم التقديم على أي قروض لو الموضوع مش ضروري وحتمي.

 

العيوب:

 

  • أنت بتدفع ثمن السفرية وزيادة بسبب نسبة الفايدة، والمبلغ لو كبير شوية، هتلاقي إنك بتدفع ثمن سفرية تانية صغيرة مثلاً.

 

  • أنت بتلزم نفسك بأقساط لمدة سنة أو أكتر عشان تدفع حاجة مالهاش فايدة في المستقبل، غير مثلاً لو أنت بتقسط عربية، فالعربية دي هتستخدمها وأنت بتسدد القرض، وحتى بعد ما تسدده، ده غير إن هيجي وقت هتبيع فيه العربية، فهيرجعلك جزء من الفلوس اللي صرفتها، ولكن في حالة السفر، أنت مافيش أي مردود مالي هيجيلك بعد السفرية ما تخلص.

 

  • ساعات البنوك بتحط غرامة للتسديد المبكر للقرض، عشان كدة لازم تسأل على البند ده، لإنك حتى لو حبيت تسدد القرض بالكامل، ممكن ماتقدرش بسبب بنود العقد.