10 ابلكيشن مجانية على الموبايل لمتابعة صحتك في 2022

مارس الرياضة بشكل مستمر وراقب عاداتك الغذائية بسهولة لما تنزل ابلكيشن أو اكتر من دول علشان تتابع صحتك في السنة الجديدة 2022، ودي الخيارات الأفضل ليك اللي هتخليك تحافظ على صحتك.

أفضل 10 ابلكيشن لمتابعة صحتك ولياقتك البدنية:

1- 30 Days Fitness Challenge

تقدر تشارك في تحدي مدته 30 يوم على الابلكيشن ده، وهتركز على منطقة معينة في جسمك لما تروح الجيم، ومن مميزاته إنه بيوفر عليك مستويات المبتدئ والمحترف، وكمان بيقدم تدريبات مختلفة يوميًا علشان توصل لنتيجة كويسة.

2- MyFitnessPal

من أشهر الابلكيشن اللي بتهتم بالصحة عن طريق حساب سعراتك الحرارية وبالتالي هتعرف انت بتاخد كام سعر في اليوم وتظبط نظامك الغذائي وتحافظ على صحتك ولياقتك البدنية من خلال الأكل الصحي.

الابلكيشن عليه بيانات ضخمة عن السعرات الحرارية لكل الأكل تقريبًا، ومطلوب منك تدخل وزنك وطولك ومستوى نشاطك البدني اللي بتقوم بيه يوميًا علشان تعرف جسمك محتاج سعرات أد ايه.

3-  Water Drink Reminder

من العادات الصحية عمومًا شرب المياه علشان تحافظ على رطوبة جسمك، و الابلكيشن ده بيساعدك تفتكر أهمية شرب كميات كبيرة من المياه يوميًا من خلال إرسال الإشعارات من وقت للتاني علشان يفكرك.

لو معندكش وقت تروح فيه الجيم استخدم الأبلكيشن ده

4-  7 Minute Workout

لو معندكش وقت تروح فيه الجيم فالابلكيشن ده افضل حل ليك، وهيساعدك إنك في خلال 7 دقايق بس يوميًا تتمرن كويس بدون ما تستخدم أي معدات رياضية في البيت.

5- C25K

افضل ابلكيشن رياضي للمبتدئين تحديدًا لمدة 8 أسابيع، وبيوفر خطة منظمة عبارة عن خليط من الجري والمشي، وممكن تمشي على الخطة 3 مرات في الأسبوع الواحد وهتلاقي نتايج كويسة.

6- Symple
 

اسم الابلكيشن بيجمع بين كلمتين هما: Simple وSymptom، وبيساعدك في كشف الأعراض الصحية بطريقة بسيطة وكمان بيديك امكانية تسجيل الحالة النفسية ليك يوميًا علشان تكتشف ازاى بتأثر على صحتك.

الابلكيشن ده بيسمح لك كمان تستخدمه كـ مذكرة طبية تكتب فيها أيام المرض وتاريخ الزيارات للدكتور وتاريخ إجراءات الفحوصات واللقاحات.

7-   Pedometer - Step Counter

ابلكيشن بيحسب لك عدد الخطوات اللي مشيتها والسعرات الحرارية اللي حرقتها، وبيشتغل من غير ماتفتح الانترنت كمان لأنه بيستعمل جهاز استشعار الحركة، وممكن توقفه في أي وقت، وتقدر تحط عليه أهداف معينة وتاخد ميداليات عليه.

8-  Pill Reminder & Medication Tracker – TakeYourPills

الابلكيشن ده هيفكرك بمواعيد اخد الدواء بتاعك، وهتحفظ الجرعات اللي لازم تاخدها والوقت بالضبط، وكمان بالنسبة للسيدات مناسب جدًا في التذكير بحبوب منع الحمل.

9-  Monitor Your Weight

أفضل ابلكيشن ممكن تنزله على ايفون وتتابع وزنك وإنتاج تقارير بيانية باستمرار لوزنك ومعدل الانخفاض فيه.

10-  FatSecret

من أشهر الابلكيشن الخاصة بمراقبة مكونات الطعام، وبيسمحلك انك تسجل كل الأكل اللي بتاكله يوميًا وكمان بيراقب نشاطك الرياضي اليومي.