10 هدايا مش مكلفة في موسم أعياد الميلاد ورأس السنة!

شهر يناير من أكتر مواسم أعياد الميلاد لصحابك وحبايبك، لو عندك حد عاوز تهاديه هدية مختلفة تفرق معاه وتكون مميزة هنقولك على 10 أفكار مختلفة ومش مكلفة.

1-   خروجة حلوة

من الهدايا المميزة اللي ممكن تقدمها لحد في عيد ميلاده خروجة للسينما أو للغداء أو رحلة في الجنينة، وتدي جزء من وقتك للي بتحبه هيفرق معاه جدًا.

2-   رحلة نيلية

فكر تقضي وقت حلو مع حد يوم عيد ميلاده وتعمله مفاجئة حلوة زي دي: فلوكة في النيل وشوية صور تذكارية هيبقى الموضوع مختلف فعلًا وذكرى حلوة هيفتكرك بيها.

3-   أدوات مساج

 مين فينا مبيقولش "نفسي حد يعملي مساج" على الأقل مرة في الشهر، ممكن تحجز جلسة مساج لحد عيد ميلاده قرب والأحلى لو اشتريت أدوات مساج ليه، ودي هتلاقيها أونلاين وبتختلف أسعارها على حسب الأنواع والماركات، بس عموما بتبدأ في حدود من 200 جنيه.

4-   جلسة تصوير

 مهما جالك لايكات على صور السوشيال ميديا هتفضل الصور المطبوعة أحلى ذكريات خصوصًا لو اتحطت في برواز على الحيطه، فممكن تعملوا سيشن تصوير مختلفة عن صور الفرح والخطوبة، سعر حجز السيشن مع المصورين المشهورين بيبدأ تقريبًا من 300 جنيه.

اشتري فضة من الهدايا المميزة للرجالة والستات وممكن تكون في حدود 200 جنيه 

5-   رحلات اليوم الواحد

 احجز سفرية ليوم واحد في الويك إند وغيروا جو مع بعض، عندك اختيارات كتير ما بين الفيوم والإسكندرية والعين السخنة والبرلس وسقارة ودهب، والرحلة كلها ممكن تتكلف من 400 لـ 1,000 جنيه للفردين تقريبًا.

6-   اشتري فضة

 الفضة بتعتبر اختيار مناسب للاكسسوارات والميداليات للبنات والرجالة، وأسعارها ممكن تبدأ من 200 جنيه، وتعتبر هدية قيمة لما تقدمها في عيد ميلاد حد بتحبه.

7-   برفان / مكياج للبنات

 من أهم قواعد شراء الهدية أنها تكون مفيدة زي مستلزماتك اليومية زي البرفان والمكياج للبنات، خصوصا أنها هتفكرها بيك. اسعار المكياج والبرفانات بتختلف علي حسب نوعها بس بتبدأ من 100 جنيه.

8-   هدية مخصوصة

 مفيش احلى من الهدية اللي معمولة ليك انت مخصوص، فممكن تطبع اسم شريكك أو صورة/جملة من فيلمه المفضل على مج أو شمعة بخور، أو علي شنطة قماش أو تيشرت، الهدية دي ممكن تتكلف أقل من 100 جنيه.

9-   هدايا بسيطة

حتى الحاجات التقليدية اللي مش مكلفة بتفرق مع الشخص اللي بتحبه زي الورد أو الشوكولاتة أو كتاب أو حاجة هاند ميد، بس اختار كويس اللي يناسب صاحب عيد الميلاد، يعني نوع شوكولاته المفضلة، وكتاب في المجال اللي بيحبه مثلًا.

10-  هدايا مبتكرة

فكر تقدم مج حراري عليه صورة صاحب عيد الميلاد أو تجيبله مخدة رقبة، الهدايا المخصص للشخص بتسعد أكتر من أي حاجة تانية.