5 خروجات في القاهرة مش هتكلفك كتير

ساعات الواحد بيحس إنه كل ما بينزل بيدفع فلوس كتير، بس في الحقيقة في حاجات الواحد ممكن يعملها في القاهرة من غير ما يدفع فلوس خالص، أو يدفع حاجة قليلة.

1. عرض فيلم كل يوم حد في المعهد الهولندي الفلمنكي

كل يوم حد بيبقى في عرض لفيلم مستقل في المعهد الهولندي الفلمنكي في الزمالك، وبيختلف نوع الفيلم كل مرة، ممكن يبقى مصري أو أجنبي، وساعات بيستضيفوا حد من فريق العمل لو هم موجودين في القاهرة وبيبقى في مناقشة لطيفة بعد عرض الفيلم. الحضور مجاني.

2. شارع المعز

لو أنت في مود سياحي شوية، انزل اتمشى في شارع المعز وقضي يوم لطيف في المحلات والمواقع الأثرية اللي هناك، ولو حابب تاكل، عدي على أي من محلات السجق اللي قدام باب الفتوح، بس طبعاً هتضطر تدفع تمن الساندوتش.

3. أي معرض فني

أي معرض فني أو جاليري بيبقى عايز الناس تيجي تتفرج على القطع الفنية اللي عنده على أمل إن حد يشتري حاجة، فأنت تقدر تروح تتفرج براحتك ولو يوم الإفتتاح، عادة بيبقى الفنانين موجودين وتقدر تسألهم أي أسئلة أنت عايزها.

كل يوم حد بيبقى في عرض لفيلم مستقل في المعهد الهولندي الفلمنكي في الزمالك.

4. محمية وادي دجلة

موجود في آخر المعادي، ويعتبر أقرب حتة ممكن تروحها لو نفسك تروح تتمشى في الطبيعة البرية، بس طبعاً مافيش حيوانات كتير، وغالباً أقصى حاجة ممكن تعدي عليك هو تعلب صغير كدة. كل اللي هتدفعه هو تذكرة دخول الوادي وهي 3 جنيه للمصريين.

5. درب 1718 ومجمع الأديان

     درب 1718 في الفسطاط القديمة بيعمل فاعليات كتير فنية بتبقى مجانية سواء عرض فيلم أو معرض فني أو محاضرة وهكذا، ميزتهم إنهم قريبين من مجمع الأديان، فممكن تعدي عليهم بالمرة تتفرج على الجوامع والكنايس القديمة.