5 سفريات سهلة للمصريين

السفر برة مش سهل بالنسبة للمصريين بسبب الإجراءات الكتير اللي الواحد لازم يعملها قبل ما يقدر يسافر، وطبعاً بعد تعويم الجنيه الموضوع بقى غالي شوية، ولكن لسة في كذا بلد ممكن الواحد يسافر لهم بأقل مصاريف ممكنة. فممكن تقدر ترتب سفرية لبلد من البلاد دي لمدة أسبوع على الأقل بـ15,000 جنيه مثلاً خصوصاً لو تفاديت المواسم، على أساس إن تذكرة الطيران تاخد تلت المبلغ، الإقامة التلت التاني، والمصاريف التلت الأخير، وطبعاً ده بيعتمد على قدرتك على التوفير والتخطيط لإنك كل ما حجزت بدري، كل ما قدرت توفر أكتر.  

سريلانكا

لو بتحب الشاي، يبقى أنت لازم تروح سريلانكا، لإنها من أكبر 3 بلاد مصدرة للشاي في العالم، وهناك في متحف كامل للشاي. ده غير طبعاً الطبيعة الخلابة، والمعابد والأثار الموجودة، وإمكانية زيارة بارك للأفيال. 

حاجة ما تتفوتش: تسلق قمة جبل الرحون.

المغرب

المغرب فيها أماكن كتير ممكن تتراح، وعلى حسب أنت بتحب إيه، فلو أنت مغامر شوية مثلاً، ممكن تروح تتسلق جبال أطلس، لو حابب الأكل والأسواق، يبقى لازم تروح سوق مراكش، لو حابب تشوف مباني الآرت ديكو وساحل البحر الأبيض، يبقى لازم تروح الدار البيضاء، خصوصاً لو شفت أفلام زي Casablanca أو Allied.

حاجة ما تتفوتش: زيارة لمدينة شفشاون.

لمحبي الحركة والمغامرات، نيبال هي البلد الأفضل.

جورجيا

اللطيف في جورجيا إنها موجودة في أوروبا، فتعتبر قريبة شوية، وبما إنها مش من ضمن الاتحاد الأوروبي، فهي مش محتاجة فيزا شينجن، وتقدر تقدم على الفيزا أونلاين وبتحتاج أسبوع تقريباً. بسبب قربها، فتذكرة الطيران مش غالية أوي، وفي نفس الوقت العاصمة تبليسي مؤخراً بتعتبر واحدة من المحاور الثقافية في أوروبا الشرقية. 

حاجة ما تتفوتش: الفيو من قلعة ناريكالا في تبليسي.

تركيا

ميزة تركيا إنهم ثقافياً في تشابه كتير ما بينها وبين مصر، فلو حابب تروح بلد مختلفة شوية، بس لسة فيها صفات مماثلة للشرق الأوسط، يبقى تركيا اختيار حلو، خصوصاً لو دي أول مرة تسافر فيها برة. وطبعاً لازم تروح بنفس مفتوحة لإن أغلب الأكل هناك حلو جداً، خصوصاً أكل الشارع. 

حاجة ما تتفوتش: المعدية من إسطنبول لجزر الأمراء.

نيبال

لمحبي الحركة والمغامرات، نيبال هي البلد الأفضل، أغلب الناس بتفضل تقعد يوم واحد أو اتنين في العاصمة، وبعد كدة تروح من هناك لمدن تانية، وفي ناس كتير بتحب تزور قاعدة جبل إفرست الجنوبية اللي موجودة في ساجارماثا. بس نيبال برضو معروفة بأكلها الحلو بسبب امتزاج كذا مطبخ أسيوي منهم الهندي والتايلاندي بالمطبخ النيبالي. لو حابب تجرب حاجة مختلفة، لازم تجرب الشاي المخلوط بزبدة حيوان الياك البري.

حاجة ما تتفوتش: زيارة حديقة بارديا الوطنية اللي فيها النمر البنغالي.