5 كورسات أونلاين مجانية محتاجها عشان تعلم الاستثمار!

الاستثمار خطوة إيجابية في مشوارك المالي لأنه هيعلمك كتير عن عالم الاقتصاد والمال، ومع شوية تركيز ومجهود ممكن تكون من أهم المستثمرين في مصر أو العالم كله، العائق الحقيقي هو انك لسه مش عارف تبدأ منين.

هنقولك على 5 كورسات أونلاين مجانية تبدأ بيها تتعلم أكتر عن الاستثمار.

1-   BUS-123: Introduction to Investments

الكورس ده هيديك مقدمة في عالم الاستثمارات عمومًا، والجهة اللي بتقدمه جامعة ساوث وسترن كوميونيتي كاليفورنيا في أمريكا، وهتعرف معاه ازاي تخصص استثماراتك في المكان الصح؟.

الكورس مكون من 43 محاضرة، والمحاضرة فيه بتكون مدتها من ربع ساعة لحد ساعة كاملة.

هتعرف أكتر عن: الأسهم، والسندات، وصناديق الاستثمار المشتركة، والاستثمارات قصيرة الأجل وغيرها، والميزة في الكورس إنك مش مطالب يكون عندك أي خلفية قبل كدا عن الاستثمار.

2-   “Investing Basics for Millennials” by Skillshare

كورس "أساسيات الاستثمار لجيل الألفية" عملته Skillshare  علشان تساعد الشباب في عالم المال عمومًا والاستثمار بالتحديد.

لو خايف أو مش متأكد من قراراتك المالية في عالم الاستثمار فالكورس ده هيفرق معاك أوي لأنه هيديلك ثقة في تعاملاتك وقراراتك، وهتفهم أكتر عن الفايدة المركبة والعوائد التاريخية لسوق الأوراق المالية وايه هي أهمية الاستثمار لمواكبة التضخم.

الكورس قصير، عبارة عن 5 حلقات كل واحدة فيهم 6 دقايق وفي حلقات أقل كمان يعني من الاخر في نص ساعة بس هتقدر تخلص الكورس كله.

خد شوية نصايح من واحد من أشهر رجال الأعمال من هنا، أهم 5 نصايح عن الإستثمار من رجل الأعمال وارن بافت

3-    “Investing 101: Stock Market Course for Beginners” by Stock Market 101

الكورس ده تحديدًا مركز على تعليم البورصة للمبتدئين، ومكون من 10 فصول، ومهتم بتعليم الطلاب تعريف الأسهم، ومؤسسة التدريب الأوروبية، والصندوق المشترك، والسند وغيرها.

كل ما هتتقدم في الكورس هتلاقي في تطور وتفاصيل أكتر علشان تفهم التداول بشكل مبسط وازاي الأسواق بتتحرك؟

4-    “Investing 101: Understanding the Stock Market” by Skillshare

اعرف أكتر عن سوق الفلوس قبل ما تدخل في عالم البورصة، ومن مميزات الكورس ده إنه بيرشد الطلاب يعرفوا أكتر عن دور الوسيط، وايه هو السهم؟، وليه شركات كتير بيتم طرحها للاكتتاب العام ، وايه هو الصندوق المتداول في البورصة (ETF) وغيرها من المفاهيم.

الكورس بيتكون من 8 دروس، والدرس الواحد عبارة عن دقايق بشكل مبسط، وبيتم تدريسه من خلال Business Casual، ودي شركة وسائط رقمية.

5-   “Investing Master Class” by Wealthsimple

Wealthsimple ، هي عبارة عن خدمة لإدارة الاستثمار على الانترنت، عملت كورس اسمه "فئة الاستثمار الرئيسية" علشان تعلم الأشخاص الاستثمار بدون كل المصطلحات الصعبة يعني هدفها التبسيط.

الكورس مكون من 10 مقاطع فيديو قصيرة، هتحتاج أقل من 45 دقيقة عشان تخلص الكورس كله.

كل مقطع فيديو بيتكلم في موضوع مختلف، ومن الموضوعات الرئيسية: كيفية عمل سوق الأوراق المالية، وفلسفات الاستثمار الموجودة زي الاستثمار السلبي وايه هو الاستثمار المسؤول اجتماعيًا ومفاهيم تانية كتير.