6 أسئلة وأجوبة عن المرتب، ازاي ترد عليهم في الانترفيو!

بتحس إنك متوتر من الأسئلة في الانترفيو؟ طيب عاوز تعرف ايه هي الإجابات المثالية؟ كمان في طرق ذكية للهروب من بعض الأسئلة أو تأجيلها لنهاية المقابلة علشان تكون الإجابة واضحة و متغيرهاش زي مثلًا متوقع تقبض كام؟!
 

1-   متوقع تقبض كام (لو السؤال في بداية الانترفيو)؟

ردك: أفتكر أنه من الأنسب أعرف تفاصيل أكتر عن طبيعة الشغل والمهام المطلوبة مني ودوام العمل، والميزانية اللي محددينها، وكمان بيهمني أعرف الفرص المستقبلية لتطور الشركة، خاصة إني بدور على الاستقرار ومحتاج أعرف معلومات أكتر عن نشاط الشركة علشان أقدر أحدد المرتب المناسب.

2-   تعمل ايه لو القائم بالمقابلة مصمم يعرف المرتب المتوقع في بداية الانترفيو؟

لو لاقيت إلحاح من القائم بالمقابلة محتاج يعرف رقم وإجابة واضحة ممكن تحط رينج معين لمرتبك يتناسب مع خبراتك ومؤهلاتك والمسمى الوظيفي.

وحط في اعتبارك إن لو الرقم اللي قولته بيفوق توقعات المكان ممكن تتفاوض معاهم لو في تقريب للمسافات بدون أي حرج  لكن لو حسيت إن الفرق كبير فالمكان مش هيكون مناسب ليك.

المهم دايمًا في الانترفيو إنك تسمع للآخر كل اللي هيتقال لك

3-   كنت بتقبض كام في وظيفتك الأخيرة؟

قبل ما تقول الرقم فهم القائم بالمقابلة المسئوليات اللي كنت بتقوم بيها علشان تكون المقارنة واضحة، وخلي ردودك في إطار المناقشة الهادية لأن في النهاية أنت شخص بتنضم لشركة فأنت اللي جاي عليهم وأكيد كل مكان فيه نظام معين.

أوقات كتير تقدر توصل لنقطة تلاقي معاهم وأوقات تانية بتكون الأمور صعبة.

4-   شايف إن المرتب مناسب ليك (نهاية المقابلة)؟

في حالة لو المرتب أقل من توقعاتك لازم تشوف لو في مميزات تانية زي علاوات سنوية وتقدير لساعات العمل الإضافية "الأوفر تايم" أو الدوام نفسه المطلوب منك مناسب للمرتب.

خليك مرن واسمع كل التفاصيل وعلى فكرة مش لازم تاخد قرار في وقت الانترفيو ممكن ترد عليهم في نفس اليوم أو بعدها بيوم حسب الاتفاق مع القائم بالمقابلة، ولو شركة كبيرة هيتبعتلك ميل رسمي بالعرض.

5-   متوقع تقبض كام (في نهاية المقابلة)؟

الوقت دا بيكون مناسب ليك أكتر لأنك خلاص قلت كل مؤهلاتك وخبراتك وعرفت كمان المهام الوظيفية المطلوبة فبالتالي الأمور بقت أكتر وضوح ليك، وحاول قدر الإمكان ماتقولش رقم واضح انتظر منه الرقم اللي هيقوله.

يعني مثلًا قول: أنا حابب أسمع عرضك الأول؟ ومتوقع انه ممكن يكون متناسب فعلًا مع مؤهلاتي وخبراتي.

6-   الراتب اللي حددناه هو ..... هل ده مناسب ليك؟

في اللحظة دي خلاص أنت بتكون عرفت المرتب فلو الرقم قليل فعلًا اتكلم إنك معجب بالوظيفة لكن المرتب أقل من توقعاتك ولازم تعرف تفاصيل أكتر عن المميزات هل في تأمين، بدلات، حوافز، علاوات سنوية،…إلخ، لأن ممكن الحاجات دي تفرق معاك لو موجودة. اعرف أكتر تفاصيل الباكدج كاملة علشان تحسب حسبتك صح.

ولو المرتب مناسب ترد بهدوء بدون انبهار.

تقدر تأمن على نفسك ضد الحوادث الشخصية من خلال فايدتي لو الشغل مش مأمن عليك.
 

اعرف أعلى الوظايف من ناحية المرتب من هنا، أفضل 5 وظايف في مصر من حيث المرتب