6 نصايح للشغل من البيت

معظم الشركات دلوقتي اتجهت لتحويل الموظفين فيها للشغل من البيت لتقليل التجمعات والحد من انتشار فيروس كورونا، لكن الشغل من البيت أوقات بيكون راحة أكتر وأوقات العكس، ده بيتحدد حسب طريقة تعاملك مع الموضوع وقدرتك على تقبُله في المقام الأول، بس أوقات عشان متعودين على مكان وبيئة شغل معينة بيكون صعب علينا نركز في البيت، إحنا هنقولك على شوية نصايح ممكن تساعدك تركز أكتر:

1. حدد ساعات عملك

مش علشان بتشتغل من البيت يبقى تشتغل طول الوقت أو أي وقت، بالعكس لازم تحدد لنفسك عدد ساعات معين وتحسب وقت راحتك ويفضل يكون بالنهار عشان يكون عندك وقت بالليل تقعد اكتر مع أسرتك أو تمارس أي هواية.

2. خصص مكان في البيت يكون للشغل وبس

اختار مكان بعيد عن الدوشة، الإضاءة فيه مناسبة ومريح وابعد عن التليفزيون والموبايل علشان تفضل مركز.

أهم نصيحة انك ماتنعزلش عن العالم بشكل كامل، بالعكس حاول في أوقات راحتك تتواصل مع زمايلك في الشغل عشان تحس بنفس جو الشغل وتقدر تكمل بشكل أحسن.

3. اكتب كل أول يوم اللي هيتعمل النهاردة

مهم جداً تحدد الحاجات اللي لازم تنجزها النهاردة وتتحدى نفسك إنك تخلصها علشان تعرف كل يوم أنت بتعمل إيه وتعرف تقيّم نفسك صح.

4. ماينفعش تبدل مكان الشغل بالسرير 

لو عوّدت نفسك إن السرير بس للنوم والمكتب بس للشغل وماينفعش أي مكان تاني يكون للشغل هتلاقي نفسك بعد كده مُهيأ أكتر وعندك نشاط وتركيز أكتر لما بتقعد عند المكتب، وهتنام أسرع لما تكون على السرير.

5. ماتفقدش التواصل مع اللي حواليك

أهم نصيحة انك ماتنعزلش عن العالم بشكل كامل، بالعكس حاول في أوقات راحتك تتواصل مع زمايلك في الشغل عشان تحس بنفس جو الشغل وتقدر تكمل بشكل أحسن.

6. ماتشتغلش بلبس البيت

جرب بعد ما تصحى وتفطر تغير هدومك علشان تدخل جوه موود الشغل أكتر، وياسلام لو لبسك كان لونه أخضر، أزرق أو أسود دول أكتر الوان بتساعد في زيادة التركيز على عكس الأصفر، الأحمر والرمادي.