7 أفكار للتوفير لو ناوي تستقل عن أهلك ماديا | فايدتي

7 أفكار للتوفير لو ناوي تستقل عن أهلك ماديا

تاريخ النشر: في نصايح ببلاش

7 أفكار للتوفير لو ناوي تستقل عن أهلك ماديا

ازاي توفر عشان تعرف تستقل ماديا عن أهلك!

ظروف كتير بقيت بتجبر الشباب أنهم يستقلوا عن أهلهم ويتنقلوا من مدينتهم أو يسافروا بره مصر، ده غير اللي ظروف شغلهم و دراستهم بتجبرهم ينقلوا بس فى نفس المدينة عشان يكونوا أقرب وما يتزنقوش فى المواصلات كل يوم. الاستقلال ده بيعرف الشباب ازاي يعتمدوا على نفسهم فى كل حاجة، وده بيحتاج أنهم يوفروا بكل الطرق الممكنة، عشان كده هنقدم لكم 5 أفكار ممكن تساعدكم توفروا على قد ما تقدروا.

 

1-استغل وقت فراغك

 

لو لسه بتدرس ممكن تستغل أيام الإجازات وتبدأ تشتغل وظايف فريلانس مش محتاجة خبرة كبيرة. فى اختيارات كتيرة زي إدخال البيانات Data Entry وكتابة المقالات في الويب سايت الأونلاين لو عندك الموهبة، وممكن كمان تأخد كورسات جرافيك ديزاين وتشتغل فى المجال، أو ممكن تستغل المهارات اللي عندك زي اللغات عشان تدي دروس تقوية فيها، أو السواقة وتشتغل على أوبر أو فى توصيل الدليفري.

 

2-اتعلم الطبخ

 

من أهم قواعد الاستقلال هي الاعتماد على النفس وانك تتعلم تعمل كل حاجة بنفسك زي الطبخ، خصوصا أنه صعب تستغني عن الأكل وصعب كمان تكلف نفسك فلوس الدليفري كل يوم، اللي بحسبة بسيطة كدا لو قلنا أنك هتطلب بـ 30 جنيه بس فى اليوم هيبقي 30 × 30 ب 900 جنيه فى الشهر ممكن توفر نصهم لو اتعلمت الطبخ خصوصا ان ده للغدا بس ولسه فى فطار وعشا. ممكن تطبخ مرة فى الاسبوع وتشيل الاكل فى التلاجة عشان تنجز فى الوقت، وهتلاقي وصفات سهلة كتير على الانترنت للناس اللي عمرها مادخلت المطبخ.

 

3-استمتع بالشمس

 

لو بتشتغل من البيت أو بتذاكر كتير من البيت الصبح حاول تستمتع بالشمس والاضاءة الطبيعية. ودي تعتبر ميزتين فى خطوة واحدة، توفير فى فلوس كهرباء، وهتاخد فيتامين د Vitamin D  طبيعي يقوي مناعتك ضد الأمراض.

 

الاستقلال ده بيعرف الشباب ازاي يعتمدوا على نفسهم فى كل حاجة

 

4-امشي على اد ماتقدر

 

اعتبر الماشي 2×1 رياضة ببلاش من غير اشتراك جيم ولا كارنيه نادي، ومواصلة سريعة من غير إشارات للمشاوير القريبة، وهتوفر كتير لو مشوارك اليومي مش بياخد اكتر من نص ساعة مشي كل يوم.

 

5-تابع المينيماليزم Minimalism

 

  المينيماليزم هو منهج استخدام المفيد والأساسي بس والاستغناء عن أي زوايد ممكن تصعب الحياة، حاول تتابعه ومع الوقت هتكتشف أنك بتضيع فلوس كتير في حاجات ملهاش لازمة تقدر توفر وتستغني عنها بسهولة.

 

6- جرب السكن المشترك

 

بدل قررت تبعد عن أهلك يبقي تأخد التجربة للأخر وتجرب العيشة مع زمايلك في إيجار رخيص عشان توفر على قد ماتقدر.

 

7- بلاش التاكسي جرب الميكروباص

 

اتجه دايما لأرخص وسايل المواصلات وبلاش التاكسي، اتجه للميكروباص خصوصا اللي بـ أبلكيشن زي سويفل وأوبر باص.

تقدر تعرف أكتر عن الأبلكيشن دي من هنا، قارن وقرر؟ أوبر باص وسويفل والميكروباص من التحرير للقرية الذكية!